Fatah

Us der alemannische Wikipedia, der freie Dialäkt-Enzyklopedy

D Fatah ([ˈfataħ], eigentlig richdig [fatħ] – arabisch فتح‎, DMG fatḥ ‚Eroberig, Siig‘) isch e politischi Bartei in de Palästinensische Autonomiigebiet.

Dr Name isch en Akronym und Ananym vo arabisch حركة التحرير الوطني الفلسطيني‎ arakat at-Taḥrīr al-waṭanī al-Filasṭīnī ‚Bewegig zur nationale Befreijig vo Palestina‘. Die Aafangsbuechstabe gäbe wenn mä se zsämmesetzt und ruckwärts liist, s Wort für „Öffnig, Eröffnig, Befreie; (Hindernisse wägschaffe)“.

D Organisation verfolgt lut ihrer Verfassig vo 1964 as Ziil die „kompletti Befreijig vo Palestina“, d „Gründig vom ene unabhängige demokratische Staat mit vollständiger Souveränität über die palestinensische Gebiet und Jerusalem as Hauptstadt“ und d „Usrottig vo dr ökonomische, politische, militärische und kulturelle Existänz vom Zionismus. In dr gliiche Verfassig betrachtet si die „israelischi Existänz in Palestina“ as „zionistischi Invasion mit kolonialer Expansionsbasis“.[1]

Im Rahme vom Oslo-Friidensprozäss het d Fatah 1993 under ihrem Vorsitzende Jassir Arafat s Existänzrächt vo Israel anerkennt, sich zum Friidensprozäss bekennt und em Terrorismus as politischem Mittel abgschwore, het aber ihri Konstitution nie offiziell gänderet. Dr Arafat het nume gsait, si siig «caduque» (hifällig, ungültig).[2]

D Fatah het in dr Vergangeheit au terroristischi Mittel brucht, zum ihri Ziil z erreiche. Terroristischi Aaschleg vo Fatah-aahänger gegen Israel, wo s immer wider eine drvo git, entspräche nüme dr offizielle Politik vo dr Bewegig, sondern wärde vo Fatahsplittergrubbe verüebt.

D Fatah isch hüte die sterksti Fraktion innerhalb vo dr Palästinensische Befreijigsorganisation (PLO). Im politische Spektrum nimmt si dr Blatz von ere ehnder konservative Partei ii, wo sich vom Islamismus vo dr Hamas und au vom Sozialismus vo der Volksfront zur Befreiung Palästinas (PFLP) abgränzt. D Fatah isch aber einewäg e berootends Mitgliid in dr sozialdemokratische Sozialistische Internationale.

Fuessnote[ändere | Quälltäxt bearbeite]

  1. Introduction to the Fateh Constitution
  2. The New York Times: «Arafat Reaffirms Stand On Palestinian Charter»

Weblingg[ändere | Quälltäxt bearbeite]