Ostrogotha

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

De Ostrogotha isch e König vo de Gote gsii, wo im 3. Jh. glebt het.

Name[ändere | Quälltäxt bearbeite]

De Name Ostrogotha bidüttet »Glanz-Goot«. Umstriite isch aber, öb s Volch vo de Ostgote (lat. Austrogoti, Ostrogothi) noch dem König binennt sind, oder öb de König sin Name vo dem Volch het. Do er vom hütige Rumänie uus agiert het, werd agnoo, as er de letscht König gsii isch, wo öber all Gote gherrscht het, bevor si sich i Ost- und Westgote uftailt hend.

Famili und Tate[ändere | Quälltäxt bearbeite]

De Ostrogotha het wie de Ermanarich und de Theoderich de Gross zum Gschlecht vo de Amaler ghört. Er isch de Enkel vom Amal, Soo vom Hisarna und de Vatter vom Hunvil. De Tail vom Stammbomm, wo de Jordanes öberliferet het, dörft aber nöd historisch Sii.

Ane 246 het er miteme grosse Heer us Gote, Taifale, Asdinger und anderne Völcher s Römische Riich aagriffe. Spöter het er sinene Feldherre Argaith und Guntheric bifole nomole öber d Donau z goo und is Römische Riich iizfale. Die hend den d Römerstadt Marcianopolis bilageret und e Lösigeld erpresst.

Spöter hend d Gepide d Gote aagriffe und s isch zunere Schlacht bi de Stadt Galtis am Fluss Auha choo, wo de Ostrogotha siigriich gstaltet het.

Em Ostrogotha sin Noofolger isch de Cniva gsii.

Heldesaag[ändere | Quälltäxt bearbeite]

Wie de Ermanarich (Ermenrich) und de Theoderich de Gross (Dietrich vo Bern) het offesichtlich au de Ostrogotha i de germanische Heldesaag si Platz gfunde. S altenglische Gidicht Widsith nennt nämmli under de gotische Helde en Éastgota, Vatter vom Unwén. Die zwee Näme entsprechet offesichtlich em Ostrogotha und sim Soo Hunvil. Allerdings sind nume d Näme öberliferet.