Orsini

Us der alemannische Wikipedia, der freie Dialäkt-Enzyklopedy
Familiewabbe im Wabbe vom Babst Nikolaus' III., modärni Noochzäichnig

D Orsini si e wiit verzwigti römischi Aadelsfamilie gsi, wo vom römische Gschlächt vo de Bobone abgstammt isch und zwüsche 1100 und 1900 e groosse Iifluss uf die italiänischi Gschicht ghaa het.

Sit em Pontifikat vom Hyacinto Bobo as Coelestin III. het d Familie vo de Bobone as Verdräter vo dr Bardei vo de Guelfe lang und erbitteret gege die ghibellinische Colonna um die herrschendi Stellig in Rom kämpft.

Vo 1500 bis 1958 si d Orsini zämme mit de Colonna die bäbstlige Droonassistänte gsi, e Würde wo 1735 erblig worde isch.

D Orsini si 1629 Riichsfürste worde und 1724 bäbstligi Brinze. 1854 häi si noch em Erstgeburtsrächt dr Ditel vom ene Principe romano überchoo. Dr Zwiig vo de Orsini-Gravina, wo hüte no existiert, het 1560 dr bäbstlig Herzoogsditel überchoo.

As Folg vom Vierte Chrüzzuug häi Mitgliider vo dr Familie au Bsitz in Griecheland erworbe. Si häi mit dr Hilf vo de Venezianer d Pfalzgroofschaft vo Kefalonia gründet. 1318 isch dr Nicola Orsini Herrscher über s Despotat Epirus worde, wo denn allerdings scho rächt chlii gsi isch.

Weblingg[ändere | Quälltäxt bearbeite]

 Commons: Orsini – Sammlig vo Multimediadateie