Oiolykos
De Oiolykos (altgriech. Οἰόλυκος „Schooffwolf“) isch i de griechische Mythologi de Soo vom Theras. Wo siin Vatter sich uufgmacht hett d Insle Thera z bisidle, hett sich de Oiolykos gwaigeret mitzfaare und isch z Sparta blibe. De Theras het denn gmaint, er lösi een as Schoof under Wölf zrugg, dromm siin Name.
Er isch de Vatter vom Aigeus, em Stammvatter vo de Aigeide. De Oiolykos hett z Sparta e Heroon ghaa, nebet dem vo sim Soo Aigeus. Die Heroa sind nochem Pausanias vom Europas, Laias und Maisis gstiftet wore, wo Söö vom Hyraios und Enkel vom Aigeus gsii sind.