Närv

E Nerv (latiin. nervus, abkürzt N., Plural nervi, abkürzt Nn.; vo griechisch νεῦρον neúron was "Faade", "Seene" oder "Schnuer" bedütet.) bestoot us Närvefaasere (Zällfortsetz: Axon und Dendrite), wo parallel verlaufe, und um sä ume en Umschlaag vo Bindgwääb häi. Närve ghööre zum perifere Närvesüsteem vom e dierische Organismus und über sä wird Informazioon usduscht.

Dr Ufbau[ändere | Quälltäxt bearbeite]

Um die äinzelne Axon vom ene Närv het s en Umschlaag vo Bindgwääb, wo as Endoneurium bezäichnet wird. Meereri Axon si zum ene Närvefaaserebündel zämmegfasst, eme sogenannte Faszikel. D Faszikel sälber stecke au im ene Umschlaag vo Bindgwääb (Perineurium). Dr Bindgwääbumschlaag um dr ganz Närv ume wird as Epineurium bezäichnet.

Bi nit-perifere Närve, wie zum Bischbil bim Seenärv (Nervus opticus), wird dr üsseri Umschlaag us de Hirnhüt bildet, d Dura mater bildet do s Epineurium; s Perineurium und s Endoneurium wärde vo dr Arachnoidea beziejigswiis dr Pia mater und vom Subarachnoidalruum bildet.

Iidäilig vo de Närve[ändere | Quälltäxt bearbeite]

Noch em Ursprung vo de Närve underschäidet mä bi Wirbeldier zwüsche Spinalnärve, wo im Beriich vom Ruggemark us em Zentralnärvesüsteem (ZNS) uusechömme, und Hirnnärve, wo diräkt vom Hirni chömme. Im Beriich vo de Gliidmaassenursprüng bilde d Spinalnärve Närvegflächt (Plexus brachialis, Plexus lumbosacralis), wo sich Däil vo verschidnige Ruggemarknärve vermische und Plexusnärve forme.

Noch dr Richdig vo dr Erregigsläitig underschäidet mä zwüsche Afferänze (zum Zentralnärvesüsteem aane) und Efferänze (vom ZNS in d Periferii). D Afferänze läite sensibli oder sensorischi Informazioone, stöön also im Dienst vo dr Woornäämig vo innere und üssere Räiz. D Efferänze läite motorischi oder sekretorischi Impuls. Noch em Ziilgebiet underschäidet mä bi de afferänte und efferänte Närve no zwüsche somatische (Närve vo dr Körperwand; vo griechisch σῶμα sṓma ‚Körper‘) und viszerale (Närve vo de Iigwäid; vo latiin. visceralis ‚ wo d Iigwäid beträffe‘). Die mäiste Närve si gmischti Närve und umfasse afferänti wie au efferänti Fortsetz.

Uf em Wääg zu iirem Zielgebiet (Innerwazioonsgebiet) verzwiige sich d Närve immer mee. Die chliinere Närvenest wärde als Rami (Sg. Ramus) bezäichnet.

Weblingg[ändere | Quälltäxt bearbeite]

Commons: Närve – Sammlig vo Multimediadateie

Elektronemikroskopischi Bilder vo Närve

Dä Artikel basiert uff ere fräie Übersetzig vum Artikel „Nerv“ vu de dütsche Wikipedia. E Liste vu de Autore un Versione isch do z finde.