Nantuate

Us der alemannische Wikipedia, der freie Dialäkt-Enzyklopedy

D Nantuate (lat. Nantuatae; altgriechΝαντουᾶται, Nantouatai) sind en keltische Stamm im Wallis gsii. De Name isch Gallisch und bidütet »Tallüt« (gall. nanto »Tal«).

D Nantuate hend östlich vom Gemfersee (lacus Lemannus »Ulmesee«) im Tal vom Rotte (Rhodanus »Grossfluss«) glebt und ere Vorot isch Tarnaiae (hüt: Massongex) gsii. Anderi Ortschafte wo zu de Nantuate ghört hend, sind Viviscus (hüt: Vevey), Pennelocus (»Seechopf«; hüt: Villeneuve) und d Zollstation Agaunum (»Fels«; hüt: St-Maurice).

Si sind underem Chaiser Augustus im Alpefeldzug (25-15 v. Chr.) vom Drusus und Tiberius underworfe worde und is Römische Riich iiglideret wore. Zäme mit de Veragrer, de Seduner und de Uberer hend si denn en Bund bildet (quattuor civitates vallis Poeninae), wo zu de Verwaltigsainhait Raeti Vindelici vallis Poeninae ghört het. Underem Chaiser Claudius (41–54) sind die vier Stämm zu de civitas Vallensis zämegschlosse wore und zu de Provinz Alpes Graiae et Poeninae choo.

Büecher[ändere | Quälltäxt bearbeite]

Der Neue Pauly Bd.8: »Nantuatae«

Link[ändere | Quälltäxt bearbeite]