Nagasaki

Us der alemannische Wikipedia, der freie Dialäkt-Enzyklopedy
Hops zue: Navigation, Suech

Nagasaki isch en japanischi Induschtrieschtadt an dr Weschtküschte vo Kiuschiu. Näbscht dr Induschtrie-Produktion funktioniert sii au als wichtige Anlaufhafe vo oschtasiatische Schiffslinie. Sii het en Universität. 1923 isch Nagasaki dur nes Ärdbebe zerschtört worde und 1945 dur de amerikanisch Atombombe-Abwurf.

D Atombombe[ändere | Quälltäxt bearbeite]

Am 6. Auguscht 1945 händ d USA zwäcks forciertem Kapitulations-Druck gegenüber ihrem hartnäckige Chriegsgägner Japan en Atombombe uuf d Schtadt Hiroshima abgworfe. Do die japanischi Regierig no kei eidüütigi Kapitualtions-Geste manifeschtiert het, het me drei Tag schpöter au no Nagasaki bombardiert.

Vor em Hiroschima-Abwurf het d US-Armeeleitig für ihri zwei Bombe total vier potenzielli Ziil im Aug ghaa: Hiroschima mit damals 365'000 Iiwohner als Hauptziil, Niigata, Kokura und Nagasaki. Wo me d Bombe denn schliesslich het welle abwärfe, isch vo verschiidene Faktore, hauptsächlich vom Wätter, abghange.

Dr Präsidänt Harry Truman het offebar für en zweit Abwurf gar kein schpezielle Befähl meh uusgäh, dr Entscheid schiint vo militärische Inschtanze gfällt worde z sii. D Angriffe sind bewusst am Tag gfloge worde, will d Bevölkerig denn keini Bomber, sondern gwohnheitsmässig nur Uufklärer erwartet het und sich viilfach gar nit gschützt het drgäge.

D Wätter-Bedingige sind nit optimal gsii am 9. Auguscht, sowohl z Kokura wie z Nagasaki hets en Wulchedecki ghaa. S Hauptziil isch eigentlich Kokura gsii, und me het s drei Mol vergäblich angflooge. Denn het me Nagasaki angschtüüret, wo aber au immer no wulche-verhange gsii isch. Die damaligi Abwurf-Technik het vorgseh, uuf Sicht abzwärfe, will das mit dr damalige Technik no immer die präzisischti Methode gsii isch. Das isch aber ebe jetzt mit der Wulchedecki nit gange, also het me die Bombe radar-gschtüüret abgworfe. Am 11.01 Ortsziit isch sii detoniert.

D Wirkig vom "Fat man", ere Plutonium-Bombe, isch uus dr damalige militärische Sicht nit gröschtmöglich gsii: Wäge de gschilderete Wätterbedingige und zuedem wil Nagasaki vo Hügel und Täler durzooge isch, hets nit gliich viil Opfer gäh wie in Hiroschima. Insgesamt sind an beide Abwurfort dur d Druckwälle, dur d Hitz und dur Schtrahlechrankheit akut bis 1947 rund 120'000 Mensche ums Läbe choo, en Minderheit devo in Nagasaki. Schpööter sind denn no tuusigi wiiteri an Schtrahle-Chräbs vorziitig gschtorbe.

Dr Kommandant vom Bomber isch 40-jährig gsii, dr Pilot 25-jährig und dr Bombe-Schütz 26-jährig.

Literatur[ändere | Quälltäxt bearbeite]

  • Hans Herlin: Kain, wo ist dein Bruder Abel?
  • Knaurs Lexikon – Das Wissen unserer Zeit