Mutter Courage und ihre Kinder

Date vom Drama
Originalditel:	Mutter Courage und ihre Kinder
Gattig:	Episches Theater
Originalsprooch:	Deitsch
Autor:	Bertolt Brecht
Muusig:	Paul Dessau
Erschiinigsjoor:	1941
Uruffüerig:	19. April 1941
Ort vo dr Uruffüerig:	Zirich
Ort und Zit vo dr Handlig:	Schweden, Polen ond Deitschland en dr Zeit vo 1624 bis 1636
Persone
D Muader Courage (Anna Fierling) D Katrin, ihr stomms Dechterle Dr Eilif, ihr äldeschder Soh Dr Schweizerkas, ihr jengschder Soh Dr Werber Dr Feldwebl Dr Koch Dr Feldhauptmôô Dr Feldprediger Dr Zeigmoischder D Yvette Pottier, a leichts Mädle Dr alde Obrischt A Schreiberleng A eltrer Soldat Baura Bauersfraua A jonger Soldad Dr Fähnrich Soldada

Dialäkt: Schwäbisch

Mutter Courage und ihre Kinder ischt a Theaderstick en zwelf Bilder vom deitscha Dichter Bertolt Brecht. Der hôt des Drama als a Chronik us-em Dreißgjähriga Kriag bezeichnet. Des Stick vrzehlt d Gschicht vo dr Marketendere Courage, wo da Kriag bloß als Meglichkeit zom leichda Geldvrdeana siht, ond wo au et bereit ischt, aus dera Kadastroof zo lerna, obwohl se grad durch da Kriag älle ihre Kender vrlaura hôt.

S erschde Môl uff d Bihne komma isch des Werk am 19. April 1941 em Schauschbiilhaus Zirich. De urschbrenglich Musik zo deam Stick ischt vom Paul Dessau komboniirt wôrra. A Uffihrong em Theater ohne Kirzonga dauret rond zwoiahalb Stond.

Handlong

Ort ond Zeit

A Feldlager en dr schwedischa Provinz Dalarna, z Polen ond en Deitschland zor Zeit vom Dreißgjähriga Kriag, ond zwar en de Jôhr vo 1624 bis 1636.

Vom erschda bis zom zwelfda Bild

D Anna Firling ischt a Marketendere, wo mit ihrem Karra emmer deet nôzuit, wo-se mit de Soldada a guads Gschäft macha kô. Begleidet wuud-se vo ihre zwoi Buaba Eilif ond Schweizerkas sowia vo ihrem Dechterle Katrin, wo et schwätza kô. Älle drei Kendr send ondrweags vo vrschiidene Manna zeigt wôrra. Em Gefolge vo selle viir reiset nô no a Koch ond a Feldprediger mit.

A-ma scheena Dag lôôt sich dr Eilif vo-ma Werber zo de Soldada vrpflichda. A baar Jôhr schbäder wuud dr Muader Courage, wia d Anna Firling vo älle ghoißa wuud, ihr jonger Bua Zahlmoischtr bei-ma Regiment ond bald druff vo-ra wilda Horde entfihrt. Damit’r wiidr frei kommt, soll d Muader Courage a Leesegeld zahla. Dui vrlangda Summe kennt-se zwar uffbrenga, abr als grissena Gschäftsfrau probiirt-se, da Preis gewaldich raazodrucka. Des gôht so lang, bis de Entfihrer dr Kraga platzt ond kurzerhand sellen Bua vrschiaset.

Fir a kurza Zeit legt dr Kriag a Pause ei. En sellra Friidensfase ibrfellt dr Eilif a Baurafamilie ond wuud dô drbei vrwischt. Em Kriag wär’r fir sein Muat belohnt ond globt wôrra, abr jetzt em Friida wuud’r zom Dod vrurteilt ond standrechtlich vrschossa.

D Kampfhandlonga flackret wiidr uff. Mit ihrer stomma Katrin isch d Muader Courage nôch Halle an dr Saale komma. Vôr dr Stadt belauscht des Mädle a baar kaiserliche Soldada ond erfehrt dô drbei, dass d Bewohner em Schlôf ibrfalla werra sollet. Om de selle zo warna, nemmt-se a Drommel, steigt uff s Dach vo-ma Baurahof ond haut wia vrruckt uff des Instrument nei. Des passt nadiirlich de Soldada ibrhaupt et. Drom machet-se an kurza Prozess ond vrschiaßet des Mädle.

Au wenn d Muader Courage jetzt älle ihre Kender durch da Kriag vrlaura hôt, heert-se et uff, weidrhin mit-em Kriag a guads Gschäft zo macha.

A bissle Gschicht

Dr Brecht hôt sei Stick 1938 em Exil ôôgfanga ond s Jôhr druff em Zwoida Weltkriag ferdichgschdellt. D Uruffihrong hôt des Drama 1941 em Schauschbiilhaus Zirich erleabt. Acht Jôhr schbäter isch’s zom erschda Môl ondrem Brecht seira Regie em Deitscha Theater z Berlin uff d Bihne komma. Dui Uffihrong hôt Modellcharakter ghet. Mit dera Inszeniirong hôt s Berliner Ensemble 1954 beim Theaterfeschdival vo Paris da erschda Preis kriagt. 1960 isch d Muader Courage en sellra Inszeniirong vom Peter Palitzsch zo-ma Film vrarbeidet wôrra; luag dô drzua da Ardikl „Mutter Courage und ihre Kinder (Film)“.

Litradur ond Quella

Marion Siems (Hrsg.): Reclams neuer Schauspielführer, Verlag Philipp Reclam jun. Stuttgart, 2005, ISBN 3-15-010526-9
W. Grabert und A. Mulot: Geschichte der deutschen Literatur, Boirischer Schuelbuach-Verlag München, elfda Uflag vo 1966

Weblink