Mueshuus

47.5574583333337.5828694444444

S Mueshuus an dr Spaalevorstadt

Dialäkt: Baseldütsch

S Mueshuus isch e historischs Geböid an dr Spaalevorstadt 14 in dr Stadt Baasel. Es zelt zu de Baasler Kulturgüeter wo für d Region vo Bedütig si.

Hüte isch im Huus e Gallerii.

Baugschicht

S Huus isch 1652 baut worde as Handelshuus für «Mues», wo allerhand Ässbars drmit gmäint gsi isch: Alles Gemuess, Erbsen, Linsen, Wicken, Bohnen, Hirss, Fench, Senff, Gersten, gestampffte und ohngestampffte, wie auch Hanfsaamen, und der gleichen. Item Griess, Weissmähl, Habermähl und sonsten anderes Mähl. Bis 1840 het mä dört «Mues» verkauft, und denn het mä s Geböid an Gschäft vermietet. Wo 1874 bi dr Korrekzion vo dr Gärbergass s Zumfthuus zu Gartner abgrisse worde isch, si si für e Zitli in dr erst Stogg vom Mueshuus iizooge. 1899 het s d Bürgergmäind em Kanton verkauft und dä het s dr Actiengesellschaft für eine Gewerbehalle überloo, wo iir Verkaufszentrum us em alte Salzhuus an dr Schiffländi, wo dr Birsigkorrekzioon zum Opfer gfalle isch, do aane züüglet het und s Mueshuus zun ere Gwärbhalle umbaut het. D Fassaade us em Barock isch drbii veränderet worde: mä het im Bardeer no zwäi Rundbööge iibaut, wo as Schaufänster brucht worde si.

Kwelle

• Mueshaus in der Spalenvorstadt uf basler-bauten.ch