Mosche Dajan

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Dr Mosche Dajan (1978)

Dr Mosche Dajan (hebräisch ‏משה דיין‎; uf d Wält choo am 20. Mai 1915 im Kibbuz Degania; gstorbe am 16. Oktober 1981 z Tel Aviv) isch en israelische General und Politiker gsi. As Ussenminister vo Israel het er d Verhandlige in Camp David gfüert.

Karriere[ändere | Quälltäxt bearbeite]

Wo dr Dajan vierzääni gsi isch, isch er Mitgliid vo dr Hagana (hebr. „Verdäidigung“) worde. 1939–1941 häi en d Brite z Akko iigsperrt. 1941 isch er Kommandöör vo Palmach-Drubbe under em Befääl vo dr 7. Australische Infanterii-Division gsi und het im Sürisch-Libanesische Fäldzug sis lingge Aug verloore. Im Israelische Unabhängigkäitschrieg het er d Verdäidigung im Jordandaal organisiert und spööter an dr zentrale Front kämpft. Denn het er die israelisch Delegazioon bi de Friidensverhandlige uf Rhodos gläitet. Im Joor 1954 isch er Generalstabsschef und Oberkommandöör vo dr Israelische Armee worde und het 1956 dr Ooberbefääl im Sinaifäldzug gha.

1958 het er d Armee verloo und isch im Joor druf Mitgliid vo dr sozialdemokratische Mapai worde. As Verdäidigungsminister im Säggsdaagchrieg isch er in Israel zu hoochem Aasee choo und uf dr ganze Wält bekannt worde. Im Herbst 1973 het er d Armee nit welle mobilisiere, wil er nid glaubt het, ass d Egüpter und d Sürer en Aagriff wurde wooge. D Regierig vo dr Golda Meir het noch em Jom-Kippur-Chrieg denn müesse zrugdräte. D Mapai het 1977 d Waale verloore und dr Menachem Begin isch Brömieeminister worde. Si Bardei, dr Likud, het denn kuum Erfaarig gha im Regiere. Dr Dajan as Ussenminister het groosse Iiflussuf d Politik chaa und het e wichdigi Rolle bim Usarbäite vom Friidensabkomme mit Egüpte vo 1979 (Camp David I) ghaa. 1979 isch er us Brotest u. a. gege d Siidligspolitik vo dr Regierig zruggdrätte.

Wärk[ändere | Quälltäxt bearbeite]

  • Die Mission meines Lebens. Bericht über die ägyptisch-israelischen Friedensverhandlungen 1977-1979. Bertelsmann, Münche 1981, ISBN 3-570-01373-1.
  • Leben mit der Bibel. Archäologie im Heiligen Land. Molden-Verlag, Wien 1984, ISBN 3-217-01218-6.
  • Shabtai Tevet: Moshe Dayan. Politiker, Soldat, Legende. Verlag Hoffmann und Campe, Hamburg 1973, ISBN 3-455-07705-6.

Weblingg[ändere | Quälltäxt bearbeite]

 Commons: Mosche Dajan – Sammlig vo Multimediadateie

Fuessnoote[ändere | Quälltäxt bearbeite]