Miss Van

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
es Wandbild vo der Miss Van z Barcelona

Under em Name Miss Van isch d Künschtlere Vanessaa Alice Bensimon, wo anne 1973 z Toulouse uf d Wält cho isch, i dr Öfentlechkeit bekant. Me seit von ere au öpe, si ghöri zu de beschte Streetart-Künschtler uf dr Wält.

In ihrere Jugendzyt het d Vanessa Bensimon zäme mit der Streetart-Künschtlere Mademoiselle Kat z Toulouse agfange Bilder a Huuswänd mache. Si het gly e ganz en eigete Styl entwicklet. Ihri wybleche Figuure, wo me ne i der Streetart-Szeene poupées seit, sind öpis eigets; si gsehnd fasch wie überdimensionierti Bääbi uus; tüpisch sind grossi Auge und Posizione, wo gwüssi Gfüel und hüffig au erotischi Botschafte chönte zeige. D Figuure glychen em Styl vo Cartoons. Wandbilder mit so Süschee, signiert mit dr Underschrift vo dr Künschlere, sind mit de Joore i verschidene Stedt uftaucht, au usserhalb vo Frankrych. Und d Künschtlere macht au Gmäld uf anders Material, bsunders uf Lynwand.[1]

Bilder vo der Miss Van sind mit der Zyt internazioonal meh uf Uusstellige z gseh gsi, wo si deils sälber kuratiert het. So Uusstellige het’s z Europa, z Amerika und z Oschtasie scho ggää. D Miss Van läbt z Barcelona. Über die Stadt het si au scho es bar Büecher gschribe.

Dr Miss Van ihri Bildmotiv mit stereotype erotische Frauefiguure sind bi deil Feminschtinne mängisch nid guet acho. Anderi Kritiker säged aber, die Uusdrukswys sig e chreftige Protäscht gäge patriarchalischi Struktuure i der Kunscht oder chönten au es Zeiche für di soziali Bewegig vo dr Body-Positivity sy.[2]

Weblink[ändere | Quälltäxt bearbeite]

Fuessnoote[ändere | Quälltäxt bearbeite]

  1. Van and the Evolution of the Feminine from Brick onto Canvas (Site cha nüme abgrüeft wärde; Suche im Webarchiv)[1] [2] Vorlage:Toter Link/cujah.org uf cujah.org
  2. Weekly Style Muse: Miss Van's Painted Ladies, Body Pos Pinups With Attitude uf bustle.com