Mischa Wyss

Dr Mischa Wyss (* 10. Novämber 1983 z Oute) esch e Bärner Mondart-Chansonnier ond Kabarettescht.

Wärdegang

1983 z Oute uf d Wäut cho, het am Mischa Wyss sini lyrischi Karriere scho früeh met em Verfasse vo Samichlausvärsli aagfange. Im Louf vo de Primarschueu het er die mit wytere chlyne verbale Wärch fortgsetzt. Nach em Omzog es Basubiet, won är d Sekondarschueu ond s Gymnasiom absolviert het, het er glehrt Kybord schpele on het HipHop-Tegscht verfasst, won er zo säuber komponierte Beats performt het.

1999 het är met em Gwenn vom e ne Literaturprys e Meileschtei vo sinere literarische Karriere erreicht.

2004 esch är nach Bärn zoge, won är a der Uni es Johr Psychologie schtudiert het.

Denn esch er för es paar Mönet nach Marokko greiset. I der dörtige Kontemplation send die erschte Chanson-Tegscht entschtande, won är nach sinere Röckchehr nach Bärn vertont ond, met em nöi glehrte Gittareschpöu begleitet, vortreit het. Inschpiriert dorch d Chansonnier vo sinere Chendheit het so de Mischa Wyss zo sinere ureigene Usdrocksform gfonde.

Die am Aafang vor auem em Fröndes- ond Familiechreis vortreite Wärch händ grosse Aaklang gfonde, so dass är sech denn e chörzischter Zyt ou met Uftrett be Openmiks (Iischtiger Bönine) en Bärn e beachtete Name gmacht het ond schpöter denn aus Schpeziaugascht vo dene iiglade worde esch.

Ändi 2009 het ehm s Panorcheschter Bärn d Glägeheit bote vor grossem Publikom sis Lied Haarigi Romanze zom Beschte z gäh – es esch met grosser Begeischterig ufgnoh worde ond het dezue gfüehrt, dass är erschti Engegements e diverse Lokal en ond om Bärn öbercho ond baud de Schprong of d Bönine vo de Chlykonscht gschafft het.

2010 esch em Tonschtudio PanMagic sini erschti CD Vohrsiube e de Uflag vo 200 Schtöck brönnt worde, wo scho gly vergreffe gsy esch.

Vo 2010 bes 2014 het är e de Piazza-Bar z Bärn s Format Mundart 2.0 organisiert, won är de Mondartchaonson-Szene monatlech e Plattform bote ond namhafti Köschtler för Gaschtuftrett gonne het.

2012 het är e de La Cappella z Bärn d Prömiere vo sim erschte Programm Uftakt gfyret. Be dem Aalass het d Lisa Catena sini nöi CD Wortwärts touft, won är em Tonstudio Christoph Trummer ufgnoh het. Be dere Prömiere send de Chansonnier Mischa Wyss ond der Schtepptänzer Nicolas Egger s erscht Mou gmeinsam ufträte ond händ demet e nöii Schtiurechtig of d Böni brocht, wo aus Mundartstepp bekannt worde esch.

2013 het ehm der Uftrett a de Könschtlerbörse z Thun de Publikomsprys ond öffentlech de Tetu Mani Matter vom 21. Jahrhundert brocht.

Parallel zo sim Schaffe aus Bärner Chansonnier, het de Mischa Wyss es Johr a de Pädagogische Hochschueu absolviert ond esch denn weder a d Uni zroggkehrt, won är es Mathematik- ond es Germanistikschtudiom abgschlosse het. Enzwösche esch er aus Mathematiklehrer tätig ond jährlech be öber föfzg Uftrett of de iischlägige Bönine z gseh.

2014 het är d Prömiere vo sim zwöite Programm Aasatzwys gfyret met dem är denn während zwöi Johr em ganze schwizerdütsch-schprochige Ruum es breits Publikom begeischteret het.

Set em Mai 2016 loht sech de Mischa Wyss sowou aus Solokönschtler (Mundartchanson), aus ou aus Duo met em Nicolas Egger (Mundartstepp) dor e Bärner Kulturschaffendi Bjørn Strømme mänätsche.

D Premiere vom dritte Programm „Schrift für Schrift“ het zäme mit em Stepptänzer Nicolas Egger am 13. Oktober 2016 i der La Cappella in Bärn stattgfonde. D Ufnahme vo dere Premiere hät 2017 aus Live-Cd/DVD söue erschyne. Dr Stepptänzer het sich 2017 vo der Bühni zrogg zoge. D Produktion het sich of ne CD mit Mundartchansons und satirische Iilage beschränkt. D Taufi vo dere CD het am 29.12.2017 i der wederom usverchoufte La Cappella stattgfonde und het demet bewese, wie beliebt s Bärner Mundarchanson und de Mischa Wyss im Bsondere esch.

Programm

• 2012 Uftakt
• 2014 Aasatzwys
• 2016 Schrift für Schrift

Diskographi

• 2010: Vohrsiube (Maxisingle mit drü Chansons)
• 2012: Wortwärts(Debutalbum mit 18 Chansons)
• 2017: Schrift für Schrift (Live CD)

Weblink

• d Website vom Mischa Wyss

Fuessnote

Dä Artikel basiert uff ere fräie Übersetzig vu dere Version vum Artikel „Mischa_Wyss“ vu de dütsche Wikipedia. E Liste vu de Autore un Versione isch do z finde.