Hip-Hop

Us der alemannische Wikipedia, der freie Dialäkt-Enzyklopedy
Hops zue: Navigation, Suech

D HipHop-(Sub-)Kultuur isch in de 1970er Joor entschtande. Dr in Jamaika geboreni Kool DJ Herc hed in dr Bronx Funk-Blatte ufgleggt und d Breaks verlengered, drzue hed er nach jamaikanischer Art toastet - schpöter hed me das rappe gnennt. Anderi wichtigi musikalischi Yflüss sin vo Lüt wi em DJ Hollywood ko; d.h. Disco-DJs. 1979 schliesslig sin di erschte zwai Rap-Bladde usekoo, zersch "King Tim III" vo der Funk-Gruppe Fatback Band (zäme mit em Rapper King Tim III) und denn "Rappers Delight" vo dr Sugarhill Gang.

Anderi wichtigi Aschpäkt vom HipHop sin s DJing, Breakdance, Grafitti

Gschicht vom HipHop[ändere | Quälltäxt bearbeite]

Vorleufer vom Rap gits vili - hüffig wird uf d Griots vo Weschtafrika verwise, uf afroamerikanischi Radio-DJs, uf e Reggae und vor allem d Toasting-Technike. Au im R&B isch scho vor 1979 grappt worde - vor allem "Here Comes the Judge" vom Pigmeat Markham isch Rap avant la lettre (bzw. avant le disque) in Rainkultuur. D Last Poets und dr Jazz-Poeet Gil Scott Heron wärend au hüffig erwäänt.

Di erschte Rap-Tracks hänn sich musikalisch noni vo Funk und Disco unterschide. Aber scho bald hed der HipHop aigeni musikalischi Merkmool entwickelt: zersch hed der Grandmaster Flash mixe und scratche uf Blatte voorgfiert, denn hed der Afrika Bambaataa zäme mit de Broduzänte John Robie und Arthur Baker dr Electro Funk erfunde.

Dr Electro Funk isch au an dr Weschtküschte und in Miami seer populäär gsi; in Miami hed sich sogaar e neue Stil entwickled: dr Miami Bass, wo sich in den 90er Joor in Detroit mit em Techno zu Ghetto Tech verschmolze hed.

Ab Mitti 80er Joor hänn HipHop-Broduzänte aagfange, James Brown-Blatte z'sample. Dr Yfluss vo Funk-Blatte us de 70er Joor hed sich immer mee verschterggt, au an dr Weschtküschte. Dr Gangster Rap - dr erschti originäri Stil vo dr Weschtküschte - hed sich zum melodiösere G Funk gwandlet - dank em Dr. Dre.

Au an dr Oschtküschte isch dr HipHop lang us Breakbeats und andere Samples vor allem us Funk-Blatte us de 70er Joor zämegsetzt gsi. Ersch in de schpätere 90er Joor hed sich - unter Yfluss vom HipHop us em Süde vo den USA - en elektronischere Styl duregesetzt.

Inhaltlig isch s im HipHop am Aafang vor allem um Parties gange - aber scho frie sin au bolitischi Täggscht wichtig worde, zersch bim Brother D und bim Grandmaster Flash - zersch in sym beriemte Stück "The Message". 1978 hän denn Public Enemy HipHop musikalisch und täggschtlig erneuered - radikali Bolitigg und Musig.

Ändi 80er, Aafang 90er isch Afrozentrismus seer en vogue gsi. Dr Gangster Rap schliesslig hed dr inhaltligi Schwärpunggt wägg vo Afrika und dr Bolitigg verschobe.

Unter em Yfluss vom Gangster Rap und woorschynlig au uffgrund vo der allgemaine bolitische Laag sin bolitischi Inhalt unterdesse nümm so en vogue im HipHop.

Afang 90er Joor hed sich dr HipHop au in Europa immer mee duregsetzt - Rapper und Gruppe wi IAM in Franggrych, Articolo 31 und dr Frankie Hi NRG in Italie, Die Fantastischen Vier und Advanced Chemistry in Dütschland und dr Black Tiger, EKR (Ein König regiert), Primitive Lyrics und Sens Unik in dr Schwytz hän aagfange, in ire aigene Sprooche z rappe.

Hip House[ändere | Quälltäxt bearbeite]

Dr Musigstil Hip House - au bekannt als House Rap - isch e Mischig us Hip Hop und House.

Verschideni Elemänt si us de beide Stile îgflosse: D Bass Drum und ds Tempo isch vom House übernô, während dr Sprächgsang es dütlechs Elemänt vom Hip Hop isch.

Lueg au[ändere | Quälltäxt bearbeite]