Minimalpaar

Us der alemannische Wikipedia, der freie Dialäkt-Enzyklopedy

E Minimalpaar isch e Baar vo zwai Wörter, wo sich nume um ai fonetisch-fonologischs Merggmool unterschaide, z. B. "Muus" - "Huus" - " Luus" uf Alemannisch. Das Byschpil bewyst, das [m], [h] und [l] im Alemannische Phonem sinn. E andres Minimalpaar im alemannischi isch "Buech" - "Buuch". Vomene Nullphonem redt mer, wenn de Underschiid ahand vomene nöd vorhandne Phonem entstoot: z. B. "Buuch" - "Bruuch". Auch "Bruuch" miteme lange [uu] und "Bruch" miteme churze [u] bildet e Minimalpaar.

Dör e systematischi Bildig vo Minimalpaar cha s Phoneminventar vonere Sprooch bistimmt werde, da haisst ali Phonem wo inere Sprooch vorchömet. S Phoneminventar underschaidet sich i de verschidnige Sprooche. So het s Italienischi z. B. kai /ü/ oder /ö/ oder s Englische het [θ] und [ð], wo im Alemannische feelet.

Wen e Luut wie s /r/, wo im Tütsche und Alemannische je noch Region oder Person verschide uusgsproche werd, oni as sich d Bidütig veränderet, redt mer vonere Phonemvariante. Die baide Uusproochaarte vom <ch> ("Ich- und Ach-Luut": [ç] und [x]) im Hochtütsche bildet ai Phonem, wel si underenand kai Minimalpaar bilde chönet, sondern vo de lutliche Umgebig Abhängig sind. I dem Fall red mer vo Allophon.