Michael Kohn
Dr Michael Kohn (* 23. Dezämber 1925 z Züri; † 7. Septämber 2018 ebe dert[1]) isch e Schwyzer Ingenieur, Lobbyischt un Unternämer gsii. Wäg sym Engaschmänt fir d Chärnenergy in dr Schwyz het mer em dr Spitzname «Atompapscht» gee.
Lääbe[ändere | Quälltäxt bearbeite]
Dr Michael Kohn het anne 1948 sy Studium an dr ETH Züri as diplomierte Böuingenieur abgschlosse, wun ere derno au in dr Forschig gschafft het. 1953 isch er Projäktingenieur bim Energyunternäme Motor-Columbus AG wore, wun ere au elf Johr speter Diräkter dervu woren isch. Au Staummdammprojäkt het er glaitet.
Ändi vu dr 1950er-Johr isch er e baar Johr z Israel as Böulaiter vun eme Kanalsischtem gsii, wu Wasser vu dr Region vum See Genezareth in dr drucke Side vum Land gfiert het (National Water Carrier) – e vum Bund bolitisch unterstitzt Vorhaa, wu au Schwyzer Firme mitgmacht hän.
Ab 1964 isch er im Verwaltigsrot vu Motor Columbus ghockt un het dää vu 1975 bis 1985 bresidiert. In däne Johr het er aa dr Verwaltigsrot vu dr Aare-Tessin AG für Elektrizität bresidiert un isch dodermit Gschäftslaiter vum Chärnchraftwärch Gösge un dur sy effetli Engaschmänt s Fyndbild vu dr Atomchraftgegner gsii.
Anne 1974 isch er fir vier Johr Vorsitzer vu dr Aidgnessische Kummission fir d Gsamtenergykunzäption (GEK) gsii, was uf dytligi Kritik gstoßen isch. Är isch e wichtige Lobbyischt fir d Strommäärtliberalisierig vu dr Schwyz un het si derfir uusgsproche, ass neii Chärnchraftwärch böue wäre.
Vu 1988 bis 1992 isch dr Michael Kohn Bresidänt vum Schwyzerische Israelitische Gmaibund (SIG) gsii. No syre Pänsionierig het er fir dr Arbetschraius Kapital un Wirtschaft (akw.) gschafft, uinter anderem as Bresidänt, ere Verainigung fir liberali Stelligname un Publikatione. Dr Kohn het au aa an Klimakumferänze d Positionen vu dr Wirtsachaft verdrätte un isch in Kummissione vu Economiesuisse derzue ghockt. Är het d Michael-Kohn-Stiftig bresidiert, wu u. a. Gäld fir armi Jude sammlet. Anne 2015 het d Kohn-Stiftig e halbi Million Franke fir d Quantum-Engineering-Initiative vu dr ETH Züri gspändet. D ETH Züri het em anne 1996 d Ehredokterwird verlihe.[2]
Publikatione (Uuswahl)[ändere | Quälltäxt bearbeite]
- Energie- und Klimapolitik 2007 – Die 2000-Watt-Gesellschaft – Von der Faszination zu den Realitäten. Sonderdruck Schweizer Monatshefte, Mai 2007.
- Energieszene Schweiz. Verlag Neue Zürcher Zeitung, Zürich 1990, ISBN 3-85823-198-3.
- Ursula Koch, Michael Kohn / Patrizia Noémi Franchini (Hrsg.): Titanic oder Arche Noah: Gespräche zu Energie, Technik und Gesellschaft. Rauhreif, Zürich und Villigen 1987, ISBN 3-907764-07-2.
- Die schweizerische Gesamtenergiekonzeption: Grundzüge, Optionen, Konsequenzen, Kurzfassung. Kantonalbank von Bern, Bern 1979.
Weblink[ändere | Quälltäxt bearbeite]
- Ralph Weingarten: Kohn, Michael. In: Historisches Lexikon vo dr Schwiiz.
Fueßnote[ändere | Quälltäxt bearbeite]
- ↑ Petar Marjanovic: Er war das Feindbild der Kernkraft-Gegner: Atompapst Michael Kohn (†92) ist tot. In: Blick.ch. 7. September 2018, abgruefen am 9. September 2018.
- ↑ Davide Scruzzi: Dogmatiker des Fortschritts. In: Neue Zürcher Zeitung. 22. Dezember 2015, abgruefen am 9. September 2018.
|
Dä Artikel basiert uff ere fräie Übersetzig vu dere Version vum Artikel „Michael_Kohn“ vu de dütsche Wikipedia. E Liste vu de Autore un Versione isch do z finde. |