Mathematiker

Mathematiker schaffe as Hüeter und Witerentwickler vom Fachgebiet vo dr Mathematik und beschäfdige sich au mit dr Aawändig vo de Erkenntniss uf braktischi Belang. Mit Hilf vo mathematische Methode chunnt mä zu exakte Erkenntniss und Ussaage, in bestimmte Däilgebiet au zu kwantitative Resultat (z. B. us dr Numerik und dr Statistik).

Wil Mathematik au im Alldaag en immer gröösseri Rolle spiilt, wärde Mathematiker in vile Beriich beschäfdigt, bsundrigs in dr Forschig, in de Wirtschaftswüsseschafte, in Versicherigsundernääme, im Öffentlige Dienst (Schuele und Universidääte, Statistik), im Marketing, in dr Meteorologii, in dr Logistik, in dr Bildverarbäitig, in dr Sicherhäitstechnik und natürlig in dr Informazioonstechnik.

Spezialgebiet wo si din schaffe si under anderem die Numerischi Mathematik, d Statistik, die Mathematischi Logik, d Algebra, d Geometrii, d Analysis, d Modälltheorii und d Woorschinligkäitstheorii. Wil mä vili vo de Verfaare und Technike au uf anderi Däilberiich cha überdrääge, isch s nid immer mööglig, äidütig iizordne.

D Usbildig

Dr akademischi Graad Diplom-Mathematiker wird bechunnt mä noch eme erfolgriich abgschlossene Studium an ere Universidäät, an Fachhochschuele bechunnt mä dr Graad Diplom-Mathematiker (FH). An de mäiste Universidääte studiert mä nüün Semester bis zum Abschluss, an Fachhochschuele acht. Sit dass s öiropäische Studiesüsteam in Chraft choo isch, si für e Bachelor säggs Semester vorgsee, und denn no vier Semester, wemm mä dr Master will mache. Öb sich das daatsächlig loot lo mache, wird mä gsee, wenn die erste Absolvänte noch em nöije Süsteem mit iirem Studium fertig wärde.

Dr Inhalt vo de Studie

D Studie im Grundstudium umfasse mäistens Analysis, Lineari Algebra, Numerik, Stochastik, e Waalpflichtfach und e Nääbefach.

Im Hauptstudium wärde Beriich vo dr räine und aagwandte Mathematik verdieft, zum Bischbil in Richdig Differenzialgeometrii, Topologii, Funkzionalanalysis oder Optimierig. Drzue chunnt e Nääbefach, wo mänggisch d Aawändig vo dr Mathematik in andere Fächer behandlet, wie in de Wirtschaftswüsseschafte, Informatik oder Füsik.

Weblingg

Wikiversity: Mathematik — Kursmaterialie, Forschigsprojäkt und wüsseschaftlige Usdusch

Dä Artikel basiert uff ere fräie Übersetzig vum Artikel „Mathematiker“ vu de dütsche Wikipedia. E Liste vu de Autore un Versione isch do z finde.