Logograaf

Us der alemannische Wikipedia, der freie Dialäkt-Enzyklopedy

Dr Begriff Logograaf (altgriechλογογράφος, logographos) isch vom antike griechische Gschichtsschriiber Thukydides brucht worde (Thukydides 1, 21), zum sini Vorgänger aabezmache. Dr Altfiloloog Friedrich Creuzer het denn die Bezäichnig in dr Middi vom 19. Joorhundert in d Wüsseschaft iigfüert und in dr Gschichtswüsseschaft si denn lang die früenste griechische Gschichtsschriiber vor em Herodot, wo as dr „Vater vo dr Gschichtsschriibig“ gältet, eso bezäichnet worde.

Die modärni Forschig wiist uf d Broblematik vom Begriff Logograaf aane, und mä sött en us meerere Gründ nid für die früeje griechische Gschichtsschriiber bruuche.[1] Denn dr Thukydides brucht dä Terminus allgemäin für Schriiber vo Prosa und schliesst dr Herodot us dere Grubbe nid us, sondern kritisiert scharf. Au e Charakterisierig, wo mä bim Dionysios vo Halikarnassos findet,[2] basst nid richdig. In sim Katalog vo historische Schriftsteller vor em Thukydides brucht dr Dionysios dä Begriff nid. Vor allem aber ghööre die Autore nid zun ere gschlossnige Grubbe, sondern häi ganz underschiidligi Wärk verfasst über müthischi, historischi oder landeskundligi Themene.

Zu de Logograafe häi näben em Hekataios vo Milet, dr Akusilaos vo Argos, dr Antiochos vo Syrakus, dr Kadmos vo Milet, wo dr Soon vom Pandion gsi isch und noch mängge antike Teggst dr früest vo de Logograafe und villicht ahistorisch gsi isch, dr Charon vo Lampsakos, dr Damastes vo Sigeion, dr Hellanikos vo Lesbos, dr Hippys und dr Glaukos, wo bäidi us Rhegium gsi si, dr Ion vo Chios, dr Melesagoras vo Chalcedon, dr Pherekydes vo Athen, dr Stesimbrotos vo Thasos und dr Xanthos dr Lyder ghöört.

Fuessnoote[ändere | Quälltäxt bearbeite]

  1. Vgl. Klaus Meister: Die griechische Geschichtsschreibung. Stuttgart 1990, S. 24.
  2. Dionysios, de Thucydide, Kapitel 5.

Litratuur[ändere | Quälltäxt bearbeite]

Dä Artikel basiert uff ere fräie Übersetzig vum Artikel „Logograph_(Geschichte)“ vu de dütsche Wikipedia. E Liste vu de Autore un Versione isch do z finde.