Library of Congress

Library of Congress
S Emblem vo dr Library of Congress
Gründig	1800
Bestand	155 Millione Ditel
Bibliothekstyp	Nationalbibliothek
Koordinate	38° 53′ 16″ N, 77° 0′ 14″ W38.887777777778-77.003888888889
Ort	Washington, D.C.
ISIL	US-DLC
Bedriiber	staatlig
Läitig	Carla Hayden
Website	https://loc.gov/

D Library of Congress (LoC) isch die (inoffizielli) Nationalbibliothek vo de USA. Si lit z Washington, D.C., isch uf mehreri Gebäud verdeilt, und isch eini vo de grösste und bedütendste Bibliotheke uf dr Wält.

Bedütig

D Guetebärg-Bible

D Library of Congress het meh als 155 Millione Ditel, drunder si:

• 31 Millione Büecher und anderi Druckerzügniss in 470 Sproche
• 50 Millione Handschrifte
• 12 Millione Fotografie
• 4,8 Millione Plän und Charte,

usserdäm die grössti Sammlig vo sältene Büecher in Nordamerika, drunder e Guetebärg-Bible.

Anderi Nationalbibliotheke in de USA

• National Library of Medicine
• National Agricultural Library
• National Archives and Records Administration

Gschicht

Library of Congress am Afang vom 20. Johrhundert

D Library of Congress isch als Forschigsbibliothek vom US-Kongräss am 24. April 1800 gründet worde, nochdäm dr Präsident John Adams dr Regierigssitz vo Philadelphia noch Washington, D.C. verleit het. Sit 1802 wird si vom United States Congress Joint Committee on the Library verwaltet.

5.000 $ si usge worde für Büecher und für d Iirichtig vo dr Bibliothek im neue Kapitol. D Bibliothek het scho öbbe 3000 Bänd gha, wo si 1814 im Britisch-Amerikanische Chrieg abbrennt isch.

Druf het dr Thomas Jefferson em Kongräss si Privatbibliothek als Ersatz zum Chauf abote. Er het in 50 Johr fast 6500 Büecher in verschiidene Sproche über Philosophii, Literatur und Wüsseschaft gsammlet gha. Dr Kongräss für d Sammlig 24.000 $ zahlt und het eso dr Grundstei für e Nationalbibliothek gleit. Dr Jefferson isch überzügt gsi, ass für d Gsetzgäbig alli Theme wichdig siige und das isch immer no s Grundprinzip vo dr Library of Congress.

Am 24. Dezember 1851 si im ne Füür 35.000 Büecher und anderi Gegeständ, drunder en Originalporträt vom Christoph Kolumbus verbrennt.

Spöter het d Bibliothek ihri Beständ as Depositär für e urheberrächtlig Schutz vo Wärk wäsentlig chönne erwiitere. Wär noch em amerikanische Urheberrächt si Wärk het welle schütze, het zwei Exemplar vo siiner Arbet gratis dr Bibliothek müesse ge. Das isch sit 1859 d Funktion vom Patäntbüro, wo denn gründet worden isch. Wäge däm und wägem e Brand, wo zwei Drittel vom Bestand vernichtet het, isch d Library of Congress in ärnsthafti finanzielli Schwiirigkeite cho.

Dr Ainsworth Rand Spofford het 1864 s Copyright Deposit widr für d LoC gwunne und het für d Bibliothek die finanzielli Unterstützig vo beide Kongrässparteie übercho. So het er si wäsentlig chönne vergrössere.

Z Krasnojarsk in Sibirie het dr G. W. Judin en umfassendi Privatbibliothek (öbbe 100.000 Bänd) gha, wo 1906 noch Amerika verchauft worden isch und dr Grundstei für die Russischi Sammlig in der Kongrässbibliothek bildet.

Dr Bibliothekshushalt wird no hüte zum ne grosse Deil vom Kongrass zahlt. Zu de Usgobe ghört au dr Underhalt vo drei beeidruckende Gebäud z Washington, D.C.

Fuessnoote

Dä Artikel basiert uff ere fräie Übersetzig vum Artikel „Library_of_Congress“ vu de dütsche Wikipedia. E Liste vu de Autore un Versione isch do z finde.