Lex Romana Visigothorum

Incipit vom ene Exemplar vo dr Lex Romana Visigothorum, datiert uf s 10./11. Joorhundert.

D Lex Romana Visigothorum (S römische Gsetzbuech vo de Westgoote) vo 506, au Breviarium Alarici(anum) (S Brevier vom Alarich), isch e bedütendi Zämmestellig vo Kaisererläss und juristische Erklärige. D Lex Romana Visigothorum isch e Zämmefassig vom weströmische Wulgarrächt und het bis in s Hoochmiddelalter in Südwestöiropa Bedütig gha.

Wie s entstande isch

Si isch am Aafang vom 6. Joorhundert under dr Bezäichnig „Lex“ im Westgooteriich (Lex Romana Visigothorum) und im Burgunderiich (Lex Romana Burgundionum) in dr Form vo Uszüüg us eltere juristische Schrifte zämmegstellt worde, het fast nume römischs Rächt enthalte und isch woorschinlig nume für die romanischi Bevülkerig gültig gsi, wo denn im äigentlige Sinn nüme römisch gsi isch. D Gsetzerlass bzw. d Bestätigunge vom Rächt, wo bis denn gulte het, stöön woorschinlig im Zämmehang mit de chriegerische Usenandersetzige zwüsche de germanische Noochfolgerriich uf em Boode vom ufglööste Römische Riich; as Rächtssicherige isch s iiri Rolle gsi, bi dr katholische Chille und für Understützig bi dr iihäimische Bevölkerig für d Obrikäit z wärbe.

Dr Inhalt

D Lex Romana Visigothorum bestoot us:

• Sächzää Büecher vom Codex Theodosianus
• D Nowälle vom
  • Theodosius II.,
  • Valentinian III.,
  • Markian,
  • Majorian und
  • Libius Severus,
• D Institutiones vom Gaius,
• Fümf Büecher vo de Sententiae Receptae vom Iulius Paulus;
• Drizää Kapitel us em Gregorianische Codex
• Zwäi Kapitel us em Hermogenianische Codex
• E Fragmänt vom erste Buech vo de Responsa vom Papinian

Kwelle

• Gustav Hänel: Lex Romana Visigothorum. Teubner, Berlin 1849 (Noochdruck: Scientia Verlag, Aalen 1962).

Weblingg

• Alti Usgoob: Codicis legum Wisigothorum libri XII (1579)
• Die lex Romana Visigothorum in der Bibliotheca legum regni Francorum manuscripta, Handschriftendatenbank zum weltlichen Recht im Frankenreich (Karl Ubl, Universidäät z Köln).

Dä Artikel basiert uff ere fräie Übersetzig vum Artikel „Lex_Romana_Visigothorum“ vu de dütsche Wikipedia. E Liste vu de Autore un Versione isch do z finde.