Leo VII.

Us der alemannische Wikipedia, der freie Dialäkt-Enzyklopedy

Dr Leo VII. (* z Rom; † 13. Juli 939 z Rom) isch vum 3. Jänner 936 bis zue sym Dod Papscht gsii.

Dr Leo isch us ere remische Familie gstammt un isch e Benediktiner un vor sym Pontifikat Kardinalprieschter vu San Sisto gsii. Är isch dr erscht vu fimf Päpscht gsii, wu uf Wysig vum remische Firscht Alberich II. gwehlt wore sin.

Dr Leo VII. het sich mit em Alberich II. fir d Chloschterreform vu Cluny yygsetzt. Dr Abt Odo vu Cluny isch uf Rom gruefe wore. Wu dr italienisch Chenig Hugo vu Arles Rom zum zwaite Mol belageret het, het dr Abt e Fride zwisch em Alberich un em italienische Chenig vermittlet, wu in ere formale Eh zwisch dr Alda, dr Dochter vum Hugo, un em Alberich gipflet het.

In dr Zyt vum Pontifikat vum Leo het dr Chronischt Flodoard vu Reims dr Papscht bsuecht. Em Erzbischof vu Hamburg-Bremen isch s Pallium verlihe wore. Dr Leo het dr Erzbischof Friedrich vu Mainz ufgforderet, d Jude z verdrybe, wu sich nit hän welle bechehre loo.

Wel dr Leo VII. sälber Benediktiner gsii isch, het er sich unter anderem fir d Reschtaurierig vu Chleschter engaschiert, zem Byschpel fir S. Paolo fuori le mura usserhalb vu Rom.

Dr Papscht Leo VII. isch z St. Peter begrabe wore.

Literatur[ändere | Quälltäxt bearbeite]

  • Harald Zimmermann: Leo VII.. In: Biographisch-Bibliographisches Kirchenlexikon (BBKL). Band 4, Herzberg 1992, ISBN 3-88309-038-7, Sp. 1441–1442.
  • Ytrag in d Catholic Encyclopedia, Robert Appleton Company, New York 1913 (änglisch)

Weblink[ändere | Quälltäxt bearbeite]

 Commons: Leo VII. – Sammlig vo Multimediadateie


Dä Artikel basiert uff ere fräie Übersetzig vu dere Version vum Artikel „Leo_VII.“ vu de dütsche Wikipedia. E Liste vu de Autore un Versione isch do z finde.