L'Indifférent oder Der Bilderraub
| Dialäkt: Schwäbisch |
L’Indifférent oder Der Bilderraub ischt a Handlongsballett en fenf Bildr mit dr Musik vom Schweizer Kombonischda Hans Haug. S Libreddo hôt dr Otto Maag gschriiba ond dr Heinz Rosen hôt d Choreografii drzua gmacht. S erscht Môl uf d Bihne komma isch des Werk em April 1947 em Stadttheater Basel. Dô drbei hend dr Rovi Parinow ond d Nicole Breton d Hauptrolla danzt.
D Persona vo dr Handlong
[ändere | Quälltäxt bearbeite]- Dr Indifférent (dr Gleichgildige) us-em gleichnamiga Gemälde vom franzeesischa Rokoko-Môler Antoine Watteau
- S jonge Mädle
- Dr Môler
- A Professr
- A Matros
- A schbanischs Danzpärle
- A alda Kopischdin
- A Mitgliid vom Preisrichterkolleg
- Dr Kuldusminischtr
- A Grubbe vo jonge Mädla
- Vorschiidene Bsuacher em Museom
- Danzgäscht
- Zwoi Polezischda
- Journalischda
- A Wächtr vom Louvre ond sonscht noh a baar Neabafigura
Handlong
[ändere | Quälltäxt bearbeite]Ort ond Zeit
[ändere | Quälltäxt bearbeite]Des Ballett schbiilt z Paris (Frankreich) em Jôhr 1910.
S Erschde Bild: Em Louvre
[ändere | Quälltäxt bearbeite]D Bsuecher em Museom gucket sich d Bildr ôô. Am moischda entressiret-se sich fir des Gemälde L’indifférent vom Watteau. Oiner vo de Bsuecher ischt a Môler, wo sich Gedanka driber macht, wia-nr am beschda des Bild stehla kennt.
A Grubbe vo jonge Mädla – laudr Ballett-Elevinna – kommt mit ihrem Professr drzua. Dr sell helt seine Schialerenna an kurza Vortrag ond gôht nô mit-en weitr. Abr oi Mädle bleibt zruck ond guckt ganz gebannt uff da Indifférent. Uff oimôl fangt der ôô, sich em Bild zo bewega. Dô driibr isch des Mädle ganz baff ond vrschrickt. Entsetzt rennt-se weg zo ihrer Grubbe.
D Effnongszeit vom Museom ischt rom. Älle Leit vrlasset da Saal. D Liachtr ganget aus. S dauret et lang, ond mr siht a donkla Gschdald mit-ra Blendladern em Saal uffdaucha, wo schnurstracks uff des Bild mit-em Indifférent zuagôht. Ganz sorgfäldich schneidet dui Gschdald des Konschtwerk us-em Rahma ond vrschwendet mit seim Raub us-em Fenschtr. Kurz druff macht an Wächtr sein Rondgang em Museom, merkt abr nix vo deam Diibstahl.
S Zwoide Bild: Em Môler seim Atelier
[ändere | Quälltäxt bearbeite]Dui Elevin, wo em Louvre so gebannt uff da Indifférent guckt hôt, nutzt em Môler sei Atelier als Iabongszemmr ond probt an Schbitzadanz. Drweil hefdet dr Môler sei gschdohles Gemälde uff d Staffelei. So langsam wuud’r miad ond braucht sei Bettruha. S Mädle abr vollfihrt ällerloi Denz vôr-em Bild, emmr wiidr em-ma andra Koschdiim. Wia-se en dr Rokoko-Kloidong uffdridd, stôht ganz bletzlich dr Indifférent en Lebensgreeße vôr-ra. Jetzt danzet boide mitnandr. Wia dia zwoi merket, dass dr Môler vo seim Schlôf uffwacht, hauet-se mitnandr ab.
S Dridde Bild: En dr Moulin de la Galette
[ändere | Quälltäxt bearbeite]Bei-ma Ball fihret d Preisträger vo-ma Koschdiimwettbewerb vrschiidene Denz uff. Ganz ooerwardet kommt a nuis Pärle drzua ond ziagt d Uffmerksamkeit vo de Ballgäscht uff sich. Dia zwoi send dr Indifférent ond dui Ballettschialere. Pletzlich kommet a baar Zeidongsbuaba ond weiset uff d Schlagzeil nô, wo ibr da Raub vom Watteau-Bild informiirt. Uff oimôl fellt älle Ballgäscht dui Ehnlichkeit vo deam nuia Denzer mit sellem uff-em Watteau seim Bild uff. Wia nô dia Ballgäscht vrsuachet, da Indifférent zo schnabba, suacht dr sell mit seira Partnere schnell s Weide.
S Virde Bild: Em Park Jardin des Tuileries
[ändere | Quälltäxt bearbeite]Om vo de Vrfolger et vrwischt zo werra, isch dr Indifférent mit dr Elevin uff-na Poschdamentle gflichdet, wo-se – zamma mit-ra Pudde – s Konschtwerk Amor zwischen zwei Liebenden pandomimisch darstellet. D Vrfolger fallet dô druff rei ond rennet vorbei.
Dia zwoi steiget vom Sockl raa ond danzet mitnandr. Jetzt kommt dr Môler drzua ond fordret da Indifférent zom Kampf raus. Dô drbei zeigt sich, dass dr sell dr Sterkere ischt. Er fihrt da Kampf abr et bis zom Schluss durch, sondern geit da Môler frei. Nô gôht’r zom Mädle nomm, fihrt dui em Môler zua ond vrschwendet us-em Park.
D Vrfolger kommet zruck mit zwoi Polezischda em Schlebbtau. Dia vorhafdet da Môler ond s Mädle ond fihret-se ab.
S Fenfde Bild: Wiidr em Louvre
[ändere | Quälltäxt bearbeite]Wia dr Indifférent en da Louvre zruckkommt, werret uff oimôl älle Persona uff de Bilder lebendich ond fanget zom Danza ôô. Pletzlich schellt d Alarmglock. An Haufa Leit – au dr Môler ond d Elevin – drenget en da Saal rei ond staunet: Jedes Gemälde hanget wiidr an seim alda Platz, au dr Indifférent.
Des Mädle abr ond dr Môler denket mit Wehmuat an dui Zeit zruck, wo dr Indifférent noh lebendich gwäa ischt.
Quell
[ändere | Quälltäxt bearbeite]Otto Friedrich Regner + Heinz-Ludwig Schneiders: Reclams Ballettführer, 8. Uflag, Stuegert 1980, ISBN 3-15-008042-8