Kunschthus Zoog

Geböid vom Museum (2011)

S Kunschthus Zoog isch es Museum z Zoog. Es het di bedütendschti Sammlig vo der Wiener Modärni usserhalb vo Öschtrich.

1977 het s Kunschthus Zoog i der Altstadthalle ufgmacht. Sit 1990 hets es eignigs Geböid in ere Aalag us em 16. Jahrhundert, em «Hof im Dorf», am Rand vo der Zooger Altstadt. D «Zooger Kunschtgsellschaft» und d «Schtiftig vo de Fründe vom Kunschthus Zoog» si d Trägerschaft vom Kunschthus. D Kunschtgsellschaft isch füre Betriib vom Kunschthus verantwortlech und zudäm Eigetümerin vo der Kunschtsammlig. Usschtellige und d Sammligstätigkeit wärde dür Biträg vo der öffentleche Hand, dür Unterschtützig vo Private sowi dür Mitgliderbiträg finanziert. Der Matthias Haldemann isch sit 1990 Diräkter vom Museum.

D Sammlig vo Wärch vo der klassische Modärni mit em Schwärpunkt Wien verdankt s Huus der Schtiftig Sammlig Kamm. Si isch 1998 vo der Christa, em Peter und der Christine Kamm gründet worde und schtellt d Beschtänd em Kunschthuus as Duurliigaab zur Verfüegig. Unter de meh as 400 Wärch vo der Schtiftig Sammlig Kamm befinde sich bedütendi Wärchgruppe vom Herbert Boeckl, em Richard Gerstl, em Josef Hoffmann, em Gustav Klimt, em Oskar Kokoschka, em Koloman Moser, em Egon Schiele und em Fritz Wotruba. Derzue chöme Wärchgruppe vo der europäische Modärni, em Expressionismus und Bauhaus.

Weblink

 Commons: Kunsthaus Zug – Sammlig vo Multimediadateie

• Literatur vu un iber Kunsthaus Zug in dr bibliografische Datebank WorldCat
• Website vom Kunschthus Zoog
• Homepage Schtiftig Sammlig Kamm

Fuessnote

47.1649078.517413