Konon vo Samos

Us der alemannische Wikipedia, der freie Dialäkt-Enzyklopedy

Dr Konon vo Samos (* um 280 v. d. Z. uf Samos; † um 220 v. d. Z. vermuetlig z Alexandria) isch e hellenistische Mathematiker und Astronom am Hoof vom Ptolemaios III. und sinere Frau Berenike z Alexandria gsi.

Er isch mit em Archimedes befründet gsi und mä dänggt, ass er die archimedischi Spirale entdeggt het. Vom Pappos und Appolonios vo Perge wäiss mä, ass er under anderem Schrifte über Konike und über Astronomii verfasst het. Die si aber alli verloore gange.

S Stärnbild «D Hoor vo dr Berenike»[ändere | Quälltäxt bearbeite]

Im Konon si Naame isch vor allem wäge dr Gschicht über d Hoor vo dr Köönigin bekannt, wo us dr Zit um 245 v. d. Z. überliiferet isch und vo wo s Stärnbild D Hoor vo dr Berenike (Coma Berenices) si Naame überchoo het.

S Stärnbild «D Hoor vo dr Berenike».

Dr Ptolemaios und d Berenikes häi grad ghürootet gha, wo dr Köönig wägem e Verroot gege d Seleukide in Chrieg zooge isch. D Köönigin häig denn iiri Hoor dr Liebesgöttin Aphrodite versproche, für dass dr Ptolemaios gsund wider wurd häi choo. Si het d Hoor zum Tämpel am Kap Zephyrion brocht, aber churz druf si si verschwunde, und niemer het gwüsst, was bassiert isch. D Berenike und au dr Köönig, won er zrugg gsi isch, sige seer bestürzt gsi. Doch dr Hoofastronom Konon het drfür en Erkläärig ghaa:

S Opfer häig de Götter sovil Fröid gmacht, ass si d Hoorlocke in Himmel uufe glüpft häige, und dört chönn mä sä as nöiji Stärngrubbe gsee. Das Stärnbild bestoot nume us schwechere Stärn und gseet schon e chli gwälleled us.

Eso isch die Stärngrubbe, wo mä hüte as e lugge offnige Stärnhufe aaluegt, e chliises Stärnbild im Früeligshimmel zwüschen em Löi und em Bäärehüeter (Bootes) worde. Dr Kallimachos het e Gedicht, D Locke vo dr Berenike, drüber gschriibe und dr Catull het das uf Latiinisch übersetzt.

S Gedicht vom Kallimachos verzelt au, ass dr Konon e Stärncharte zäichnet häig, aber über die isch sust nüt bekannt.

Weblingg[ändere | Quälltäxt bearbeite]

Dä Artikel basiert uff ere fräie Übersetzig vum Artikel „Konon_von_Samos“ vu de.wikipedia.org. E Liste vu de Autore un Versione isch do z finde.