D Kleiboh em Sendlfenger Sommerhofa-Park

Zwoi Ziigla bei dr Fahrt durch da Sommerhofa-Park

Dialäkt: Schwäbisch

D Kleiboh em Sommerhofa-Park vo Sendlfenga ischt a Miniatur-Boh, wo d Leit (et bloß d Kender, sondern au de Erwachsene) zo ihrem Vorgniaga a Ronde drmit fahra kennet.

Gschicht

Em Johr 1980 hot sich z Sendlfanga a Grubbe vo Bäschtler zom Vorei Dampfbahnfreunde Sindelfingen e. V. zamma-gschlossa. Glei noch dr Grendong hend dia Mitgliider drmit oogfanga, a knabb oin Kilomeder langa Strecke zo baua mit zwoi Brucka ibr da Sommerhofa-Bach, oimol nom ond nochher wider rom. Späder send so noch ond noch Gebeide drzuakomma: an Bohhof als Voreinsheim mit-ra Gardawirtschaft ond a Stellwerksheisle. Wia no a baar Johr druff d Stadt Sendlfenga da Zuschlag zor Ausrichdong vo dr bada-wirdabergischa Landesgardaschau 1990 kriagt hot ond dr Schwerpunkt vo dera Ausstellong fir da Sommerhofa-Park plant worra ischt, hot dr Dampfboh-Vorei sei Strecke vollkomma nei gschdalda miaßa. De heidig Strecke ischt rond 850 Meter lang. Während dr Gardaschau hot jeda Dag dr Fahrbetriib staddgfonda. Des ischt oina vo de Hauptaddrakziona vo dera Schau gwäa. Ond au heitzodag fendet der Fahrbetriib en dr Bevelkerong an rega Zuaschbruch.

A baar technische Zahla

Uff dera Fahrstrecke fendet mr älle viir Spurweida, wo’s en Europa geit: 89, 127, 144 ond 184 Millimeder. Drom laufet emmer viir Glois neaba-anander her. S geit 18 mehrspurige Zongaweicha. Bei dr Fahrt hend dia Ziig an Hehaondrschiid vo 2,9 Meder bei-ra maximala Steigong vo 2 Prozent zo ibrwenda.

Fahrbetriib

Fahrbetriib herrscht emmer an jedem Sonndich ond Feierdag vo morgens zehna bis oobnets om sechsa en de Monet April bis Okdober. Herrscht an so-ma Dag abr a Sauwedder, no ko’s au sei, dass dr ganz Fahrbetriib ens Wasser fellt. Do drneaba geit’s noh Sonderfahrdäg zo Hällowiin ond zom Niklausdag. Meischdens fendet au oimol em Johr a internazionala Dampflokomodiva-Schau stadd, wo befreindede Kleiboh-Vorei aus andre eiropäische Lender zo Gascht send ond ihre Ziig präsendiiret.

Weitre Bilder

• 
  D Lokomodiv uff deam Bild tregt da Nama Mölm.
• 
  Dr Zug kreizt an Weag.

Weblink

• Dampfbahnfreunde Sindelfingen e. V.

48.7161749.008858