D Chartum-Resoluzioon

Us der alemannische Wikipedia, der freie Dialäkt-Enzyklopedy

D Chartum-Resoluzioon vo 1. Septämber 1967 isch bi dr Komferänz vo de Füerer vo acht arabische Staate noch em Säggsdaagchrieg z Chartum verabschiidet worde. Si het d Ussepolitik vo dene Staate bis zum Jom-Kippur-Chrieg im Joor 1973 festgläit.

S Friidensaagebot vo Israel an Egüpte und Süürie nüün Dääg noch em Säggsdaagchrieg.

Dr Inhalt vo dr Resoluzioon[ändere | Quälltäxt bearbeite]

D Resoluzioon het bestimmt:

  1. ass dr Kampf gege Israel furtgsetzt wird
  2. ass dr arabisch Öl-Boykott, wo wääred em Säggsdaagchrieg bestande het, beändet wurd
  3. ass dr Chrieg im Jemen söll beändet wärde
  4. ass Egüpte und Jordanie ökonomischi Understützig bechieme

Im dritte Absatz vo dr Resoluzioon stöön d Bestimmige, wo as die „drei Näi“ beziejigswiis uf Änglisch the „Three No’s“ bekannt worde si:

  1. NO peace with Israel – Käi Friide mit Israel
  2. NO recognition of Israel – Käi Anerkennig vo Israel
  3. NO negotiations with Israel – Käni Verhandlige mit Israel

Die Arabischi Friidensiniziative 2002[ändere | Quälltäxt bearbeite]

Die Arabischi Friidensiniziative, wo die Arabischi Liga im Merz 2002 verabschiidet het, gältet as e Verzicht uf d Chartum-Resoluzioon. D Iniziative macht s Aagebot, ass die arabische Staate iiri Beziejige mit Israel wurde “normalisiere”, wenn Israel sich uf d Gränze vo 1967 wurd zruggzie und en unabhängige palestinensische Staat mit Ost-Jerusalem as Hauptstadt wurd anerkenne.[1]

Die Friidensiniziative isch im Merz 2002 vom saudische König Abdullah ibn Abd al-Aziz vorgschlaage und im Juni 2002 vo alle 57 Mitgliider vo dr Organisazioon für islamischi Zämmenaarbet aagnoo worde, dr Iran inklusiv.[2]

Die politischi Füerig vo Israel het d Iniziative in dere Form abgleent. Dr doomolig Vize-Ministerbresidänt Schimon Peres het gmäint, es brüchti Verhandligen zum d Differänze z überwinde. Mit eme Diktat chönnte weder d Palestinenser, no d Araber no d Israeli e Löösig finde.[3]

Fuessnoote[ändere | Quälltäxt bearbeite]

  1. ↑ Torsten Teichmann: Eine fast vergessene Friedensinitiative, 2012-05-21, (Archiv), abgrüeft am 7,8,2018
  2. ↑ Michaela Birk, Ahmed Badawi: Bedeutung und Wandel der Arabischen Friedensinitiative |hrsg=Bundeszentrale für politische Bildung , 2010-02-19 abgrüeft am 7.8.2018, Übersetzig us em Änglische vom Orhan Günden
  3. ↑ John Crowley u. a.: Israel rejects Arab peace initiative, 2007-03-29, abgrüeft am 7.8.2018

Weblingg[ändere | Quälltäxt bearbeite]

Dä Artikel basiert uff ere fräie Übersetzig vum Artikel „Khartum-Resolution“ vu de dütsche Wikipedia. E Liste vu de Autore un Versione isch do z finde.
Vun "https://als.wikipedia.org/w/index.php?title=Khartum-Resolution&oldid=1007472"