Karl Kron

Dr Karl Kron (* 28. Novämber 1926 z Aarau; † 3. Oktober 2013 z Muri AG) isch e Schwizer Journalist und Unternähmer (Verleger) gsi.

Läbe

Nach dr Primar- und dr Bezirksschuel z Aarau het er es Praktikum bi der Lithografie Kohlmann z Aarau gmacht. Nach ere Lehr as Schriftsetzer und der Buechdruckerfachschuel z Aarau het er 1951 z Muri AG d Leitig vo der damalige Buechdruckerei Anton Heller und d Redaktionsleitig vo der Lokalzitig Der Freischütz übernoh. Schpöter het er au d Gschäftsfüehrig und d Redaktionsleitig vom Aargauer Anzeigers, schpöter Freiämter Woche, ere Wuchebilag, übernoh.

Dr Kron het d Priska Burkart (e Nichte vo der schpötere Druckerei- und Verlagseigetümerin Emilie Heller) ghürote. Nochär isch er Mitinhaber vo der Druckerei und em Zitigsverlag Der Freischütz worde. Mit sinere Frau het er s Unternähme Heller-Druck as Einzelunternähme bis 1997 gführt; denn hei sini beide eltischte Söhn Thomas und Marius s Gschäft übernoh und unter em Name Heller Media AG mit Sitz z Muri in e Aktiegsellschaft umgwandlet. D Zitig isch 2013 in Der Freiämter umbenennt worde, isch aber witerhin sälbständig.

Dr Kron isch zudäm 16 Johr lang Presidänt vo der Katholisch-Konservative Ortspartei bzw. irer Nachfolgerin, der CVP Muri gsi, Mitglid vom Gschworenegricht Aarau, Aargauer Verfassigsrat und Pressechef vo de Aargauer Pfadfinder gsi.

Zu sim 80. Geburtstag isch der Karl Kron 2006 vo der Kulturstiftig St. Martin z Muri uszeichnet worde, wil er sech publizistisch für d Kultur vom Dorf igsetzt het.

Dr Karl Kron isch bis is höche Alter mit em Unternähme vo sine Söhn verbunde blibe und het sech für e Freischütz im Rahme vo sine Möglechkeite witerhin journalistisch betätigt. Sini letschte Läbesjohr het er zäme mit sinere Frau Priska z Muri i däm Hus verbrocht, wo immer s Dehei vom Ehepaar und Standort vom Unternähme Heller-Druck gsi isch.

Am 3. Oktober 2013 isch er i sim Heim überraschend a Härzversäge gschtorbe.

Kwälle

• Churzbiografii vom Karl Kron uf der Website vo der Edition LEU.
• Eddy Schambron: Verleger und Redaktor Karl Kron hat über 50 Jahre lang geschrieben. In: az Aargauer Zeitung, 8. Oktober 2013
• Feierstunde zum 80. Geburtstag von Karl Kron uf murikultur.ch