Jungwacht Blauring Schweiz

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Dialäkt: Züridütsch (See)

Jungwacht Blauring Schweiz isch dr Name vome Dachverband, wo i de düütschschprachige Schwiiz Chinder- und Jugendarbet understützt und förderet. Dezue ghöred öpe 420 Schare, wo d Arbet mit de Chind und Jugendliche vor Ort organisiered und durefüered.[1]

Entstande isch de Verband us de zwei ehemols rechtlich selbständige römisch-katholische Chinder- und Jugendverbänd Jungwacht und Blauring. D Jungwacht isch tradizionell für Buebe und dr Blauring für Maitli zueständig. Sit de 70-er Johr, im Zämehang mit ere vermehrte Zämearbet vo bedne Verbänd, gits au gmischti Schare oder einzelni gmischti Gruppene innerhalb vo Blauring- und Jungwachtschare. Gmischti Schare nänned sich Jubla (Jungwacht + Blauring). Beidi Verbänd händ sich im Zuug vo dr Ökumene au gegenüber andere Konfessione göffnet.

Di ehemolige Verbänd Jungwacht und Blauring händ d Verbandsziitschrift ideejubla use geh. Sit 2012 erschinnt da Informazionsblatt för Jubla-Mitglider ab Stufe Leiter under em Name Hosesack 3-mol jöhrlich.[2]

Gschicht[ändere | Quälltäxt bearbeite]

Ihri Urschprüng händ Jungwacht und Blauring i dr katholische Jugendbewegig nach em Erschte Weltchrieg.

Jungwacht[ändere | Quälltäxt bearbeite]

Im Jahr 1932 isch dr Schwiizerischi Jungwachtbund als Vorschtufe zum Schweizerische Katholische Jungmannschaftsverband (SKJV) gschaffe worde, wo scho 1893 gründet worde isch. Uf dr Verbandsfüehrertagig vom SKJV am 11. und 12. September vo dem Jahr isch vorgschlage worde, i dr Jungwacht di katholische Gruppe vo junge Burschte zämezschlüüsse, wo bereits a viilne Orte innerhalb vo dr düütschsprachige Schwiiz entschtande si. Namensgeber für de neu Bund isch d Jungwacht Birsfelde worde, wo in Birsfelde bi Basel entschtande isch und wo au für di üsseri Erschiinig vom Jungwachtbund mit siim grüene Hemd mit em schtilisierte Chrischtuszeiche prägend worde isch. De Patron vo de Jungwacht isch de Don Bosco, en Priester und Förderer vo de Juged z Turin.

Blauring[ändere | Quälltäxt bearbeite]

D Gründig vom Blauring gaht uf e Versammlig am 17. September 1933 zrugg. Als Chinderschtufe vo dr damalige Jungfraue-Kongregation plant, sind bi dr Zämekunft d Grundlinie vom neu gschaffene Verband feschtgleit worde. Dr Name Blauring hät debii einersiits s Wiibliche (vo dr katholische Mueter Gottes, Maria, ihre wird d Farb blau zuegordnet) und anderersiits d Gmeinschaft (Ring) symbolisiert.

Jubla[ändere | Quälltäxt bearbeite]

I de 1970er Johre händ beidi Verbänd aagfange eng zäme z schaffe. Uf Grund vo de gsellschaftliche Umbrüch vo dere Ziit, wo au i dr Chile ihri Würkig entfalteted, händ si sich vo ihrne beide Gründerverbänd (Jungmannschaftsverband und Marianische Kongregation) glöst. Als Jubla händ si sich vo volkschilchlich orientierte Verbänd zu Chinderorganisatione entwicklet, wo nebed em Aagebot a christlich prägter Freiziitkultur au gsellschaftlichi Zielsetzige verwürkliche wänd.

Jungwacht Blauring Schweiz[ändere | Quälltäxt bearbeite]

A de Delegierteversammlig vo beidne Verbänd im Johr 2009 isch enere Fusion zugstumme worde. So isch de neu Verband Jungwacht Blauring Schweiz entstande.[3]

Verbandsstruktur[ändere | Quälltäxt bearbeite]

lokal[ändere | Quälltäxt bearbeite]

D Arbet mit de Chind findet vor Ort i de Pfarreie schtatt, wo döt i Gruppe und Schare organisiert sind.

Gruppe[ändere | Quälltäxt bearbeite]

D Gruppe, wo öppe fünf bis 15 Chind umfassed, chömmed regelmässig im Ein- bis Zwei-Wuche-Rhythmus zu Treffe (Gruppeschtunde) zäme. Deet wird gmeinsam gschpiilt, gwercht, Theater gschpiilt oder e Viilzahl vo andere Aktivitäte duregfüert.

Trotz dr enge Zämearbet zwüsched Jungwacht und Blauring werded uf dere underschte Ebeni vo dr Verbandstätigkeit i dr Regel d Gruppe nach Gschlechter trennt. Es beschtönd allerdings au vereinzelt gmischti Gruppe. Vor allem bi Jugendliche ab 14 Jahr, wo in sogenannte "15er-Teams" oder dr "Plattform Jugend" zämegfasst sind, findet kei Gschlechtertrennig schtatt. D Betreuig vo de Gruppe liit i de Händ vo ältere Jugendliche zwüsched 16 und 25 Jahre. Je ein bis zwei vo däne Leiter und Leiterinne leited e Gruppe.

Schar[ändere | Quälltäxt bearbeite]

E Schar beschtaht us allne Gruppe von ere Pfarrei. Au d Schare werded oftmals no nach Maitli und Buebe underteilt, so dass es hüüfig Pfarreie mit ere Jungwacht-Schar und ere Blauring-Schar git. Allerdings gits au gmeinsami Schare, und neu entstehendi werded hüt fascht uusschliesslich als gmischtgschlechtlichi Jubla-Schare ggründet. A dr Schpitze schtaht d Scharleitig, wo grösseri Veraaschtaltige wie biischpiilswiis Ferielager organisiert. E wichtigi Funktion hät au dr Präses, wo sowohl für de Kontakt zur Pfarrei als au zu de Eltere vo de Chind zueschtändig isch. Sie oder er verfüegt teilwiis über e chirchlichi Uusbildig und isch au für d Organisation vo religiöse Sache mit zueschtändig.

regional[ändere | Quälltäxt bearbeite]

För regionali Aaläss, Us- und Witerbildig vo de Gruppeleiter und -leiterinne isch d Kantonsleitig zueständig. I Kantön mit villne Schare gits zuesätzlich no mehreri Regionalleitige, wo d Bedürfnis vo de einzelne Schare i de Region chönd abdecke. Usser em Grundkurs wärded alli Kürs im Zämehang mit Jugend und Sport (J+S) duregfüert.

Arbetsstelle[ändere | Quälltäxt bearbeite]

Di ehreamtliche Regional- und Kantonsleitige werded dur e Mitarbeiteri, en Mitarbeiter, wo teilzit binere Arbetsstell aagstellt isch, understützt. Arbetsstelle chas ime Kanton mehreri geh. D Arbetsstelle händ villfach au Material, wo d Schare chönd för en Aalass uslehne.[4]

schwizwit[ändere | Quälltäxt bearbeite]

Bundesleitig[ändere | Quälltäxt bearbeite]

Gmeinsam hät d Jubla in Luzern e Gschäftsschtell, d Bundesleitig. Nebed Verwaltigsuufgabe kümmeret si sich au um pädagogischi und pastorali Aalige.

Verbandsleitig[ändere | Quälltäxt bearbeite]

Di ehrenamtlichi gmeinsam Verbandsleitig vo Jungwacht und Blauring isch dr Vorschtand vo de beide Verbänd. Die Zämearbet isch uf Bundesebeni vertraglich greglet. Dur das isch es nöd nötig für beidi Verbänd trennt d Poschte z bsetze. Lediglich s Präsidium isch no gsonderet z wähle.

Bundesversammlig[ändere | Quälltäxt bearbeite]

D Bundesversammlig isch s höchschte Jubla-Gremium. Si tritt zwei Mal jährlich uf Iiladig vo dr Verbandsleitig zäme. Delegierti us de einzelne Kantön schtimmed über Finanzfrage, Mitgliedschafte und anderi grundsätzlichi Sache ab.

Mitglider und Schare[ändere | Quälltäxt bearbeite]

Uf Bundesebeni händ Jungwacht und Blauring 29'850 Mitglider und 423 Schare (d Zahle beziend sich uf s Johr 2016[5]):

Mitgliderentwicklig
Johr 2004 2005 2011 2012[6] 2015 2016
Mitglider 32'178 31'798 28'737 28'288 29'284 29'850
  devoo Buebe 9'774 9'453 8'303 8'089 8'023 8'078
  devoo Maitli 14'588 14'409 12'710 12'390 12'508 12'817
  devoo Leitendi 7'816 7'936 7'724 7'809 8'753 8'955
Schare 505 496 449 445 425 423
  devoo Jungwacht-Schare 136 124 101 100 90 88
  devoo Blauring-Schare 195 187 158 152 136 132
  devoo Jubla-Schare 174 185 190 193 199 203

Literatur[ändere | Quälltäxt bearbeite]

  • Niklaus Schmid: Jugendführer in Jugendgruppe und Freizeit. Eine sozialpsychologische Untersuchung über die Gruppenführer im Schweizerischen Jungwachtbund. Freiburg in der Schweiz 1968 [Dissertation zur Erlangung der Doktorwürde von der Philosophischen Fakultät der Universität Freiburg in der Schweiz]

Weblink[ändere | Quälltäxt bearbeite]

 Commons: Jungwacht Blauring – Sammlig vo Multimediadateie

Einzelnochwiis[ändere | Quälltäxt bearbeite]

  1. Was ist Jungwacht Blauring Schweiz? uf jubla.ch, abgruefe am 4. September 2017
  2. Hosesack under „Dienstleistungen → Kommunikationsmittel Jungwacht Blauring Schweiz“ uf jubla.ch, abgruefe am 9. August 2012
  3. Die Geschichte von Jungwacht Blauring under „Verband → Geschichte“ uf jubla.ch, abgruefe am 9. August 2012
  4. Die regionale/kantonale Ebene under „Verband → Struktur“ uf jubla.ch, abgruefe am 9. August 2012
  5. Jahresbericht 2016, Site 42 abgruefe am 4. September 2017
  6. Jahresbericht 2012, Site 32 abgruefe am 17. Oktober 2013
Information icon.svg Dä Artikel basiert uff ere fräie Übersetzig vum Artikel „Jubla“ vu de dütsche Wikipedia.

E Liste vu de Autore un Versione isch do z finde.