Josef Hug

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

Dr Josef Hug (* 7. Dezämber 1903 z Untervaz, † 6. Oktober 1985 z Waalestadt) isch en Arbeiter und Mundartschriftsteller gsi.

Dr Hug isch am 7. Dezämber 1903 als Soon vom Trukereiarbeiter und Volksmusiker Josef Anton Hug uf d Wält cho, und er het bis anne 1918 i verschidene Gmeinde d Schuel psuecht. Denn isch er uf Flums go woone und het dört als Arbeiter i dr Spinnerei Spoerry gschaffet. Wägen ere Chranket het er dr Arbetsplatz verloore, und so ischer so wie scho si Vatter Chorbflächter woorde. Mit däm Gwärb het er langi Zyt erfolgrych e grossi Chundschaft als Huusierer beliferet. Vo 1939 bis 1943 isch er zytewys vom Schwiizer Milidäär als Sanitätssoldat zum Aktyvdienscht ufbotte worde. Sid 1949 het er z Waalestadt gläbt.

Dr Chorber het scho sid dr jugend immer vil glääse und sech für vil Sachen inträssiert. So isch er druf cho, sälber au öppis z schrybe, und er het es baar Sache i dr Bünder Mundart verfasst und deils au am Radio chönne vorlääse. Sini Erinnerungen eines Korbmachers sind 1977 uf Hochdüütsch bi dr Sargaaserländische Buechtrukerei usechoo. Dr Hug isch eine vo de sältene Schwiizer Autoore us ganz eifache soziale Verhältnis. Er verzelt i sine Schrifte vom Läbe i de Dörfer mit de Sorge vo de ermere Lüüt. Au d Volchskundler sind zu iim gange, wil er e guete Gwäärsmaa für s Gwärb vom Chorber gsi isch,[1] und so het au s Historische Lexikon vo dr Schwiiz en Artikel über iin ufgnoo.

1974 het dr Josef Hug dr Kulturpryys vo der Sargaaserländer Talgmeinschaft übercho. Anne 1985 isch e Schallplatte usecho, wo’s Mundarttegscht vo iim druff het.

Am 6. Oktober 1985 isch dr Josef Hug gstorbe; er lyt uf em Fridhoof vo Waalestadt.

D Verena Maria Wyss, wo t Gründerin vo dr Schwiizerische Märligselschaft isch, het zäme mit em Oscar Eckhardt dr Nachlass vom Sarganserländer Dichter duregluegt.

Wärch[ändere | Quälltäxt bearbeite]

  • S Viöleli, 1950
  • Haidaggergreet
  • S Gmaiguet, 1959
  • Der Valtilenz, 1961
  • Dunggli Wolgga ob Salaz, Roman, 1967
  • Statthalter Bernold, 1972
  • Der Rhy chunnt hoch, 1973
  • Freuden und Leiden eines Bücherschreibers, 1974
  • Erinnerungen eines Korbmachers, 1977
  • Der Geisshirt von Zweikirchen, 1980
  • Gsamtuusgab: Verena Maria Wyss und Oscar Eckhardt: Hug, Josef. Gesammelte Werke. 2 Bände. Chur 2003

Literatur[ändere | Quälltäxt bearbeite]

Fuessnoote[ändere | Quälltäxt bearbeite]

  1. Paul Hugger: Der Korbflechter. Basel 1968.