Josef Anton Bueb

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

Dr Josef Anton Bueb (* 13. Merz 1897 z Brysach; † 26. Oktober 1974 ebedert) isch e dytsche Kommunalbolitiker un Haimetdichter gsii.

Lääbe[ändere | Quälltäxt bearbeite]

Dr Bueb isch in sym Elterehuus am Lange Wäg as Suhn vum Hermann Bueb (1855-1913), eme Rotsschryber un Grundbuechbeamte uf d Wält chuu. Är het zee Gschwischtrig ghaa. In dr Volksschuel isch er ain vu dr Klassebeschte gsii. D Realschuel het er 1913 no dr Untersekunda verloo. Wel dr Vater frie gstorben isch isch, het er us finanziälle Grind nit uf s Gimnasium chenne. Statt däm het er e Lehr as Chaufmann bi dr Dabetefabrik Erismann gmacht. Im Erschte Wältchrieg het er si freiwillig gmäldet. Noch em Chrieg het er as Induschtrychaufmann bi Erismann gschafft, ab 1921 au as Uuslandsverdrätter. Dernäbe het er si an dr Fryburger Handelsschuel wyterbildet. Anne 1928 isch er in d Niderlausitz, wun er an dr Hechere Fachschuel fir Textilinduschtry studiert het. Z Soltau in dr Niderlausitz het er d Gertrud Klenke un schließli ghyrote, Ab 1935 het er im Berliner Uusliferigslager vu Erismann gschafft, spter no z Frankfurt. Im Zweete Wältchrieg isch er yyzoge wore un an d Front chuu. Är isch in amerikanischi Gfangeschaft grote un anne 1946 wider in s verwieschtet Bysach retuurchuu. Wel au d Dabetefabrik Erismann abbrännt gsii isch, het er bi dr Arbeiterwohlfahrt z Fryburg as Gschäftsfierer aafange schaffe.

Im Dezämber 1948 isch er fir d SPD as Kandidat bi dr Burgermaischterwahl gege dr Amtsinhaber August Ehrlacher (CDU) un dr Stadtrot Otto Gutmann (FDP) aadrätte. Im erschte Wahl isch er uf 42 % vu dr Stimme chuu un isch im zweete Wahlgang schließli mit 65 % gwehlt wore. Am 29. Dezämber 1948 het er sy Amt aadrätte. Brysach isch am Änd vum Chrieg zue 85 % verwieschtet gsii. In syre Amtszyt het er si großi Verdinescht erworbe bim Widerufböu vu dr Stadt. Bis 1954 sin d Schuele, d Chinderschuel, di hischtorische Stadtdor, dr Radbrunnedurm, s Rothuus un s Minschter widerhärgsellt gsii. Nei böue wore sin d Jugedhärbärg, s Huus vu dr Juged, d Stadthalle, s Rosmann-Chrankehuus, s Altehaim un s Fyyrwehrhuus an dr Kupfertorstroß. Derzue sin Sportblätz aaglait wore un Hyyser mit stedtische Wohnige böue wore. Anne 1957 isch dr Bueb mit rund 94 % vu dr Stimme as Burgermaischter widergwehlt wore. In syre Amtszyt isch d Yywohnerzahl vu Brysach vu 2100 (1948) uf rund 5000 (1961) aagstige, dodrunter au rund 40 % haimetverdribeni Flichtling.

Bi dr erschte europäische Volksbefrogig am 9. Juli 1950, wu vu dr internationale „Europäische Bewegig“ aagregt woren isch, hän z Brysach 95,6 Brozänt vu dr Dailnämmer (bi re Wahlbedailigung vu 87,5%) „für die Beseitigung der politischen und wirtschaftlichen Grenzen innerhalb Europas und für den Zusammenschluß aller Europäischen Völker zu einem Europäischen Bundesstaat“ gstimmt. Wel dr Bueb si, nit nume bi däre Abstimmig, stark fir Europa yygsetzt het, het mer en z Brysach au dr „Europa-Sepp“ ghaiße.

Anne 1952 isch dr Josef Bueb mit em Bundesverdienschtchryz am Band un 1954 mit em Bundesverdienschtchryz erschter Klasse uuszaichnet wore. Us Gsundhaitsgrind isch er Ändi April 1962 im Alter vu 65 Johr vu sym Amt zruggdrätte un isch in Pension gange. Am 13. Merz 1963 isch em d Ehreburgerwird vu syre Haimtstadt verlihe wore. Am 26. Oktober 1974 isch dr Josef Bueb z Brysach im Alter vu 77 Johr gstorbe. Scho churz no sym Dod, im Novämber 1974, het d Gmairot vu Brysach bschlosse, e Stroß noch em Bueb z nänne.

In syre Haimetstadt het er si scho frie fir d Kultur engaschiert. Syt dr Schuelzyt het er gärn Theater gspiilt, vylmol het er Rolle gspiilt bi Uffierige vu dr 1921 grindete „Breisacher Theatergesellschaft“ Anne 1924 het er d Brysacher Feschtspiil mitgrindet un 1927 isch er Mitgrinder vu dr Brysacher Naarezumft gsii. Fir die het er dr Täxt zum Brysacher Naaremarsch gschribe un au dr Ruef vu dr Naarezumft, „Schmecksch dr Brägl?“, stammt vum Bueb.

Anne 1959 het er unter em Titel „Bißangeli - Alemannischer Humor vom Oberrhein“ e Sammlig vu iber 50 zmaischt humorvolle Gedicht im Brysacher Dialäkt vereffetligt. Vu däm Biechli sin bis 1962 drei Uflage mit insgsamt 7000 Stuck uusechuu. Anne 1996 het sy Suhn Eberhard nomol en Uflag mit 1000 Stuck uusegee.

Wäärch[ändere | Quälltäxt bearbeite]

  • Bißangeli – Alemannischer Humor vom Oberrhein. Breisach 1959

Literatur[ändere | Quälltäxt bearbeite]

  • Uwe Fahrer: Ein leidenschaftlicher Europäer und Gestalter. 40. Todestag von Bürgermeister Josef Bueb. In: Stadtanzeiger Breisach. Amtliches Mitteilungsblatt der Stadt Breisach am Rhein mit den Stadtteilen Gündlingen, Niederrimsingen und Oberrimsingen. Donnerstag, 06. November 2014 • Ausgabe 36/14

Weblink[ändere | Quälltäxt bearbeite]