John R. Hind

entdeckti Asteroide: 10
(7) Iris	13. August 1847
(8) Flora	18. Oktober 1847
(12) Victoria	13. September 1850
(14) Irene	19. Mai 1851
(18) Melpomene	24. Juni 1852
(19) Fortuna	22. August 1852
(22) Kalliope	16. November 1852
(23) Thalia	15. Dezember 1852
(27) Euterpe	8. November 1853
(30) Urania	22. Juli 1854

Dr John Russell Hind (in dr Literatur au as John R. Hind agä) (* 12. Mai 1823 in Nottingham, † 23. Dezember 1895 in Twickenham) isch e britische Astronom gsi.

Dr Hind isch 1840 am Observatorium vu Greenwich as Assistent in dr magnetische Abdeilig agstellt worre. Dert het er underem George Biddell Airy gschafft.

Anno 1844 het er sich an dr Expedition zuer Bestimmig vu dr geographische Längi vu Valencia in Venezuela deilgnu.

In dr Folgezitt het er as Beobachter an dr Privatsternwarte vum George Bishop im Regents Park gschafft. Do het er zwische 1847 un 1854 insgsamt zehe Asteroide sowie mehreri Komete entdeckt. D'Nammensgäbig vu sinem dritte Asteroid (Victoria) isch kontrovers diskutiert worre – bis dertna isch es unüblich gsi, Asteroide nooch noch läbende Persone z'benenne. Dr Hind het sich allerdings doruf rusgredet, dass er dr Himmelskörper nit uf die domolig englisch Chönigi Victoria daift häb, sundern uf die römisch Sigesgötti daift häb.

Dr Hind het d'Bahne vu 70 Himmelskörper (Planete, Asteroide un Komete) berechnet. Doryber nus het er sich au mit dr Beobachtig vu veränderliche Sterne beschäftigt, wobi er dr diefrot, variabel Stern R Leporis im Sternbild Hase (Lepus) sowie d'Veränderlichkeit vum Stern μ Cephei im Sternbild Kepheus entdeckt het. Witterhi het er bim Stern T Tauri im Sternbild Muni (Taurus) e Gasnäbel entdeckt, wo d'Helligkeit veränderlich isch (Im Hind si veränderlicher Näbel - dr Nebel reflektiert s'Liecht vume veränderliche Stern). Die vu ihm entdeckt Nova Ophiuchi 1848 (V841 Ophiuchi) im Sternbild Schlangeträger (Ophiuchus), isch die erst beobachtet Supernova vu dr Nöizitt gsi (sit dr Supernova vi 1604.

Am bekannteste isch dr Hind allerdings as Rusgäber vum fer die domolig Schifffahrt wichtige Nautical Almanac gsi, dem si "Superintendent" er zwische 1853 un 1891 gsi isch.

Fer sini Leistige het dr Hind 1853 d'Goldmedaille vu dr Royal Astronomical Society erhalde. Uf dr Pariser Gedenkmünze vu anno 1868, wo anlässlich vu dr hundertsten Asteroideentdeckig prägt worre isch, isch dr Hind näbe drei spotere Mehfachentdecker abbildet worre: Hermann Goldschmidt, Robert Luther un J. C. Watson.

Zue sine Ehre isch e dr Krater Hind uf em Erdmo sowie dr Asteroid (1897) Hind benennt worre.

Lueg au: Liste vu dr Asteroide

Wercher

Astronomical vocabulary. London 1852
Introduction to astronomy. London 1863
On the expected return of the great comet of 1264 and 1556. London 1848
The solar system. London 1846
Descriptive treatise of comets. London 1859

Dä Artikel basiert uff ere fräie Übersetzig vum Artikel „John_R._Hind“ vu de dütsche Wikipedia. E Liste vu de Autore un Versione isch do z finde.