Johann Reinhold Forster

Us der alemannische Wikipedia, der freie Dialäkt-Enzyklopedy
Dr Johann Reinhold Forster und si Soon Georg uf Tahiti

Dr Johann Reinhold Forster (* 22. Oktober 1729 z Dirschau, (Königlich Pröisse); † 9. Dezämber 1798 z Halle a.d. Saale) isch e vilsitig gebildete dütsche Naturwüsseschaftler und Entdecker in dr Zit vo dr Ufkläärig gsi. Er het au wichdigi Biidrääg zur Ethnologii gmacht. Si offiziells botanischs Autorekürzel isch „J.R.Forst.“.

Lääbe[ändere | Quälltäxt bearbeite]

Dr Forster het an dr Uniwersidäät Halle studiert, isch in dr Gmäind Hochzeit evangelische Pastor gsi, het vo 1765 aa die dütsche Wolgakoloniste und d Gebiet vo de Kolonie erforscht, isch won er im Mai 1766 si Pastoreboste verloore het zrugg uf Dütschland und denn uf Ängland.

Wo dr Joseph Banks churz vor dr zwäite Südsee-Räis vom James Cook abgsäit het, isch dr Forster vo dr Admiralidäät als offizielle wüsseschaftlige Begläiter engaschiert worde. Är und si Soon Georg häi Daagebüecher gfüert, en ethnografischi und naturkundligi Sammlig aagläit und dr Georg het Hunderti vo Zäichnige gmacht. Mit dr Veröffentligung häi si en internazionale Ruef überchoo, si aber finanziell strapaziert bliibe und häi iiri Sammlig Stück für Stück müesse verchaufe. Dr Herzog Ferdinand vo Braunschweig het e Sammlig under de Freimuurer veraastaltet und d Familie het iiri Schulde chönne abzaale. Dr Forster isch im Novämber 1779 Brofässer für Naturkund und Mineralieforschig an dr Uniwersidäät Halle worde. Er het bis zu sim Dood im Joor 1798 z Halle gläbt und isch dört uf em Stadtgottesacker im Boge 44 begraabe worde.

Literatur[ändere | Quälltäxt bearbeite]

Weblingg[ändere | Quälltäxt bearbeite]

Wikisource Johann Reinhold Forster im dütschsprochige Wikisource

Dä Artikel basiert uff ere fräie Übersetzig vum Artikel „Johann Reinhold Forster“ vu de dütsche Wikipedia. E Liste vu de Autore un Versione isch Reinhold Forster&action=history do z finde.