Jacques-Richard Chéry

De Jacques-Richard Chéry (* 2. Februar 1928 z Cap-Haitien z Haiti) isch en haitianische Maler.

Karriäre

De Chéry häd zwar scho als junge Maa gmalet gha, aber als Brotpruef isch er Guafför gsi. Dänn hät er e Tankstell im Artibonitetal gfüert. Det hät er au sini Bilder usgstellt. De Lüüt händ sini Bilder guet gfale. Drum häd er uf sin Fründ Philome Obin glosed und isch 1951 uf Port-au-Prince züglet. Ab 1965 häd er i de Galerie Issa usgstellt und gmalet.

Wärch

Em Chéry sini eltere Bilder ghöred zu de Nördliche Schuel. Sie zäiget minutiös detailliert historischi Szene oder s Alltagsläbe. Äis vo dene Bilder isch 1983 z Tüütschland (Miseror) und i de Schwiiz (Faschtenopfer, Brot für Brüedere) als Hungertuech wäred de Faschteziit i allne katholische und i de Schwiiz au reformierte Chilene ghanget. Es gilted als em Chéry sis Hauptwärch, a de Schnittstell zwüsched sim früne traditionelle Stil und sim spötere, ender komische Stil. Spöter häd er me Erfolg gha mit ender skurile Bilder. So sind zum Bischpil Bilder mit Chinde, won übergrossi Frücht und Obschtschale träged, sehr beliebt, au wäns nöd psundrigi Kunschtwärch sind.

De Chéry häd z London (1969), z Spoleto (1970), z Modena (1981), z Neu York, z Milwaukee, z Berlin (1979) und z Paris (1980, 1988, and 1990) Usstelige gha.

Literatur

• Pricht bi de Haitianische Kunschtgsellschaft
• Pricht uf Artpeers.de

Lueg au

• Lischte mit sine Bilder (Uswaal)