Islamisierig

Us der alemannische Wikipedia, der freie Dialäkt-Enzyklopedy
Hops zue: Navigation, Suech

Islamisierig bedüted d Iifüerig vom Islam als e vorhärrschendi Religion in ere Region oder im e Land, wo vorhär mehrhaitlich nöd islamisch prägt gsi isch. Historisch nännt me vor allem di islamischi Expansion im Mittlere und Noche Oste wie au uf de iberische Halbinsle, wo vom 7. bis 10. Johrhundert stattgfunde hät. I spöötere Johrhundert häts eso Bewegige au z Afrika gee.

Islamisierig maint nöd s konvertiere von ere ainzelne Person zum Islam, sondern en kollektive Umwandligsprozäss vo ganze Bevölkerige, öpe eso wie me us hütiger Sicht di christlich Mission oder d Christianisierig gsiet. Als Zwangsislamisierig bezaichnet me di erzwungeni Konvertierig zum Islam, wo noch em klassische islamische Rächt, de Scharia, under bestimmte Bedingige mögli isch. Da gits zwor eher sälte, aber, wie d Gruppe Boko Haram z Nigeria zaiged, chunnts glich no hi und do vor.

E Warnig vor enere Islamisierig vo Europa chunnt regelmässig vo rechtspopulistische Chrais und werd mit nationalistische Motiv und de Angst vor ere Öberfremdig begründed. E paar Byspil dezue; i de Schwiz isch bin ere Volksabstimmig im Novämber 2009 es Minarettverbot aagno worde, z Dütschland gits sit em Herbst 2014 en Verain mit em Name Patriotische Europäer gegen die Islamisierung des Abendlandes usw.