Irene Widmann

D Gudrun Irene Widmann (* 2. Dezember 1919 en Reitlenga, † 28. Oktober 2010 en Reitlenga) isch a bedeidenda Reitlenger Molere ond Zoichnere gwä.

Aus ihrem Leaba[ändere | Quälltäxt bearbeite]

D Irene Widmann ischt am 2. Dezember 1919 z Reitlenga uff d Welt komma. Noch ihrem Schuelabschluss hot-se an de Kunschtakademia vo Stuegert, Dissldorf ond Wien studiert.^[1] Hendrher ischt-se wiider en ihr Hoimetstadt zruckkomma. Wia no em Zwoida Weltkriag Reitlenga vo de Alliirde gheerich bombardiirt worra ischt, hot so a Bomb au s Haus vo dr Irene Widmann ihre Leit troffa, wo de meischde vo ihre Bilder glagred gwäa send. Drom ischt a Graußdoil vo ihre Werk fir emmer vornichdet worra.^{[A 1]}

1951 hot d Irene Widmann zamma mid em HAP Grieshaber, Karl Langenbacher, Erich Mönch ond Hadwig Münzinger da Kinschtlerkreis Die Ellipse grindet. Des ischt a Zammaschluss vo Reitlenger ond Diibenger Kinschtler gwäa. Acht Johr schbäder hot-se da Reitlenger Schriftsteller Gerd Gaiser gheiradet. Vo do oo hot sich dui Frau hauptsächlich om ihr Familie kemmret, sodass-se fir ihr Kunscht nemme viil Zeit ghet hot. Des hot sich erscht gendret, nochdem ihr Moo em Johr 1976 s Zeitliche gsegnet hot. Vo do oo hot-se sich wiider vorsterkt ihrer Kunscht widma kenna.^[2] Am 28. Okdober 2010 hot dui Frau ihre Auga fir emmer gschlossa. Stolze 96 Johr alt ischt-se worra.

A kloina Auswahl vo dr Irene Widmann ihre Bilder[ändere | Quälltäxt bearbeite]

"Selbstbildnis" (1952)^[1]
"Umarmung" (1957)
"Kandelaber" (1995)

Auszoichnonga[ändere | Quälltäxt bearbeite]

1994 hod d Irene Widmann da Gabriele-Münter-Preis^[3] griagt. Do drbei handlet’s sich om an Kunschtpreis, wo seit 1994 ausschliaßlich an Fraua vorliha wuud, wo ihr 40. Lebensjohr ibrschridda hend. Ausglobt wuud seller Preis vom Bundesministerium für Familie, Senioren, Frauen ond Jugend.^[4]