S Imbergässli
Koordinate: 47° 33′ 29″ N, 7° 35′ 10″ O; CH1903: 611093 / 267487
| Dialäkt: Aaglobaaseldütsch |
S Imbergässli isch e Stääge in dr Baasler Altstadt, wo d Saddelgass mit em Noodlebärg verbindet.[1]
Gschicht
[ändere | Quälltäxt bearbeite]Im 14. Joorhundert het s Gässli no «Vardellingasse», «Vardellinengasse» (noch ere Familie wo Vardel oder Bardel ghäisse het), «St.Andreasgasse» oder Andreasbärg ghäisse. D Gwürzhändler um d Andreaskapälle, wo von ene d Safrezumft usgange isch, häi 1345 e Drinkstube im Huus "zem Walraven" in dr Nööchi gha und im gliiche Joor het s e Gsellschaft "zem Ingber", wo woorschiinlig im Huus zum Ingeber dr Naame gee het. Dr Naame vo dr Gass, wo vom Andreasblatz uufe zum Noodlebärg gange isch, Imbergässli, chunnt woorschiints vo däm Husnaame.[2]
Geböid
[ändere | Quälltäxt bearbeite]Im 20. Joorhundert si e Hufe vo de Hüüser baufellig und leer gsi. Denn het mä aber afo Umbaue und Renowiere und an dr Fassaade vom Huus zem groosse Kristoffel isch e Christoforusbild us em Barock zum Vorschiin cho.[3]
S Huus «zem groosse Kristoffel», wo 1345 in ere Chronik zum erste Mol erwäänt wird, stoot am Imbergässli 31. Es isch e Woonhuus mit eme Bild vom häilige Kristof und em Jesuschindli an dr Fassaade. Im Fänster vo dr Iigangsdüüre isch s chliinste Museum vo Baasel dehäi, s Hoosesagg Museeum.