Hilf:Untersite

Bi de MediaWiki-Software cha mer Untersite erstelle, wu vu de Ober- odder Hauptsite mithilf vu'me-ne Schregstrich „/“ abdrännt were. Zum Bispil isch s Archiiv vu de Site Wikipedia:Stammtisch unter em Titel Wikipedia:Stammtisch/Archiv 2010-1 z finde, wubii d'Archiivsite e Untersite vum Stammtisch isch. E neui Untersite aalege goht genau gliich wie s Aalege vu'me-ne neue Artikel, lüeg Hilf:Neui Site aalege.

Wenn de uff ere Untersite bisch, no wird diräkt unter em Titel e Verwiis uff d'Obersite aazeigt.

Erlaubti Aawändige

Benutzeruntersite – Erstelle vu Untersite vu de eigene Benutzersite, z. B. [[Benutzer:Bispil/Artikelentwurf]] odder [[Benutzer:Bispil/Übber mich]].
Untersite im Vorlagenammensruum, wu zu de gliiche Vorlag ghöre
Unterteilig vu Arbetsabläuf in de Wikipedia, wu sust wäge de Längi un de Bearbeitigszahle uff einer Site unübbersichtlig un unhandlig wäre.
Archivierig vu Diskussionssite, wenn si z lang were

Nit erlaubti Aawändige

Neui Entwürf vu Artikel darfsch nie als Untersite aalege, wiil mer si übber de Züefallsartikel chönnt erreiche; sällewäg gitt's d'Untersite-Funktion im Artikelnammensruum nit. Sonigi Entwürf sottsch im Benutzernammensruum erstelle un erst dänn in de Artikelnammensruum verschiebe, wenn si rif defür sin.
Au für fertigi Artikel sottsch keini Untersite bruuche.

Es wird empfohle, dass de e Untersite aalèggsch, wenn de s Gfiehl häsch, de bruuchsch si. Allerdings belaste viili Untersite de Server vu de Wikipedia meh, sällewäg wird's nit gärn gseh, wenn öbber z viili Untersite uffmacht, wu niemerem nütze odder nütt mit de Erstellig vu-n-ere Enzyklopedii z düe hänn. In bsunders schlimme Fäll chönne Untersite au glöscht were.

Schregstrich in Artikelnämme

Mänki Artikel hänn Schregstrich im Namme (z. B. GNU/Linux-Namensstreit odder OS/2). In eso Fäll sott de Schregstrich in de Wikipedia au abbildet were, sällewäg isch d'Mögligkeit vu-n-ere Untersite im Artikelnammensruum au abgschalte wore.

Wie losst mer sich alli sini Benutzeruntersite aazeige?

Übber Spezial:Allpages chasch alli Site ab eme bstimmte Sitetitel uffliste loo. Do chasch de Titel vu diner odder ere andere Nutzersite iigee gò e Liste vu alle Untersite aalüege.

Wie wird e Untersite glöscht?

Wenn's dini eigeni Nutzeruntersite isch, no setzisch d'Vorlag {{Löschen|<Begründig>}} ii, d'Begründig isch in demm Fall optional. Bi-n-ere främde Nutzeruntersite odder einere i'me-ne andere Nammensruum chasch degege nit elei übber d'Löschig entscheide un müesch e Grund aagee.

„Hauptartikel“ un Untertheme

In mänke Artikel wird uff sognännti „Hauptartikel“ zu bstimmte Theme verwise, wenn sälli uff ere andere Site usfiehrliger bschribe were un für de allgemeiner Artikel z lang wäre. Säll hät nütt mit Unter- un Obersite z düe, beidi Site sin völlig eigeständig.

Gschichtligs

Am Aafang hät mer in de Wikipedia d'Untersite gnutzt für Themehierarchiie für Artikel z erstelle. Mer hät si deno allerdings mieße uffgee, wiil Artikel viilmol in mehreri Hierarchiie ghört hänn. Deno hät mer Begriffschlärige iigfiehrt un Untersite sin us em Artikelnammensruum entfernt wore. Mitti 2004 isch no s Kategoriiesystem iigfiehrt wore, wu di hierarchischi Organisation vu Artikel erlaubt, wubii Artikel au gliichzitig in mehrere Kategoriie sii chönne.