Haiwoog

Us der alemannische Wikipedia, der freie Dialäkt-Enzyklopedy
Haiwoogblatz
Haiwoog
Blatz z Basel
Haiwoogblatz
S Wiaduggt über em Blatz
Basisdaate
Ort Basel
Aagläit 19. Joorhundert
Stroosse, wo in Blatz iinechömme Binnigerstrooss
Stainedoorstrooss
Stainedoorbärg
Die Innerei Margrethestrooss
Bauwärk S Haiwoog-Wiaduggt
Nutzig
Nutzergrubbe Verkeer
Dialäkt: Baaseldütsch
Michael Grossert: «Lieu dit», Kunststoff, 1976. Die farbigi Ruumskulptur isch 1976 vom Baasler Kunstkredit aagschafft und an dr Höiwoog ufgstellt worde.

D Haiwoog isch e Blatz im Birsigdaal in dr Schwizer Stadt Baasel. Dr Birsig isch sit langem iidoolt und e groosse Däil vom Verkeer dört goot hützudags über e Wiaduggt über em Blatz.

Dr Naame[ändere | Quälltäxt bearbeite]

D Haiwoog het iire Naame von ere groosse Stroossewoog bechoo, wo 1901 vom Barfi dört uf e Blatz verläit worde isch und wo d Rossfuerwärk häi müesse druf uufe faare zum sä z wääge. Näbe dr Woog isch s Haiwooghyysli gstande und 1959, wo s d Woog scho lang nüme gee het, isch s abbroche worde, wil s zwar «gschmaggvoll sig, aber überflüssig».[1]

Gschicht[ändere | Quälltäxt bearbeite]

Drad dusse vor dr Stadtmuure bim Stäinedoor, wo hüte dr Parkblatz vom Baasler Zolli isch, hets en offnigs Gländ ghaa, wo in dr Nöizit Hiirichdige stattgfunde häi und denn Kopfabheini ghäisse het, die letschti z Baasel überhaupt isch dört am 4. August 1819 usgfüert worde. Bis zum 16. Juni 1861 isch säll Areal e milidäärische Exerzierblatz gsi. Denn het mä e Durnblatz iigrichdet für e Durnveräin.[1]

Wo mä 1866 s Stäinedoor und d Stadtmuure abbroche het und dr Stadtgraabe ufgfüllt het, isch uf em Blatz, wo dört entstande isch, bis 1885 e Söimäärt gsi.[2]

Bis dass mä im Joor 1900 e Dramlinie über d Haiwoog zum Morgartering baut het, isch d Ändhaltstell vo dr Birsigdaallinie, em Läimedaaler, no in dr Stäinedoorstrooss gsi, und denn isch si uf d Haiwoog khoo mit eme Stazioonsgeböid und e Joor druf ere Güeterremiise.

Dr underi Lauf vom Birsig isch bis 1900 ganz iidoolt gsi und 1953 isch dr Bach vo dr Haiwoog bachab au under dr Ärde verschwunde.[3]

Vo 1966 bis 1970 isch s Wiaduggt as Däil vom «City-Ring» für e Stroosseverkeer baut worde und 2009/2010 isch s renowiert worde.

Dramlinie[ändere | Quälltäxt bearbeite]

Über e Blatz gönge e baar Dramlinie: S Säggsi-Dram verbindet dr Barfi mit dr Holbäistrooss, s Zääni und s Sibzääni dr Zolli mit em Barfi, und s Sächzääni und s E11 gönge vom Barfi zur Määrthalle.

Kwelle[ändere | Quälltäxt bearbeite]

Fuessnoote[ändere | Quälltäxt bearbeite]

  1. 1,0 1,1 Haltestelle: Heuwaage uf www.tram-basel.ch, abgrüeft am 17.2.2014
  2. Ratschlag - Nachtigallenwäldeli, Heuwaage, Zoo uf grosserrat.bs.ch, abgrüeft am 17.2.2014
  3. Der Birsig im alten Basel uf altbasel.ch

Koordinate: 47° 33′ 4″ N, 7° 35′ 14″ O; CH1903: 611186 / 266721