Hermann Mühleisen

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Dialäkt: Schwäbisch

Dr Hermann Mühleisen (* 10. November 1903 z Echderdenga – seit 1975 Leifelda-Echderdenga –, † 17. Februar 1995 z Ludwigsburg) ischt a deitscher Kirchamusiker (Landesposaunawart, Chorleider ond Musikpädagog) gwäa.

Aus seim Leaba[ändere | Quälltäxt bearbeite]

Dr Hermann Mühleisen ischt am 10. November 1903 z Echderdenga uff d Welt komma. Noch seira Schuelzeit hot’r zerscht amol a Schuahmacherlehr gmacht ond sich hendrher noh an dr Karlshöhe Ludwigsburg[1] zom evangelischa Diakon ausbilda lassa. Em Alder vo 24 Johr schliaßlich hot’r d Priafong zom Gemeindehelfer abglegt ond em Johr druff ischt’r zom Diakon eigsegnet worra. Noh em gleicha Johr (1928) hot’r an dr Stuegerter Musikhochschuel a zwoijährigs Studiom oogfanga. Hendrher ischt’r Sekredär beim domoliga Wirdabergischa Evangelischa Jongmennerbund worra. Emmer hot’r als Ziil vor Auga ghet, bei dr Wirdabergischa Landeskirch a wirksama Posauna-Arbet uffzobaua. So ischt’r 1931 en dr Gschicht vo dr evangelischa Kirch en Wirdaberg dr erschde Landesposaunawart worra, wo des Amt als Hauptberuef ausgfillt hot.

En seira Eigaschaft als Landesposaunawart isch dr Mühleisen viil em Lendle romgreist, hot oo-ermiadlich Posaunachor-Schualonga abghalda ond d Kircha beim Grenda vo neie Posaunacheer berooda. Em Zwoida Weltkriag ischt em Mühleisen zoguad komma, dass’r a Kerperbehenderong ghet hot. So hot’r et Soldat werra miaßa ond hot em Dridda Reich sei Posaunaarbet fortfihra kenna.

Noch-em Kriag hot dr Mühleisen sei Lebensaufgab beim Evangelischa Jungmännerwerk Wirdaberg[2] fortgsetzt. Er hot an Haufa Zeit aufgwendet, om Chorlitradur zo sammla, wo fir d Arbet mit de Posaunacheer guat geignet ond leicht spiilbar ischt. 1946 hot dr Mühleisen älle Posaunacheer en Wirdaberg drzua uffgruafa, ama bestimmda Dag noch Ulm zo komma. De selle send-em gfolgt, ond so isch dr Landesposaunadag Ulm entstanda.[3]

Am 17. Februar 1995 hot dr Hermann Mühleisen z Ludwigsburg seine Auge fir emmer gschlossa. 91 Johr alt isch der Moo worra.

Quella[ändere | Quälltäxt bearbeite]

  • Siegfried Bauer: Württembergische Größen der Kirchenmusik, a Ardikel en dr Festschrift Landeskirchenmusikfest 2017, rausgäa vo de Württembergische Blätter für Kirchenmusik, Ausgab 3/2017, S. 64–73
  • Lueg d Weblink

Schrifda[ändere | Quälltäxt bearbeite]

  • Posaunenchoralbuch zum Evangelischen Kirchengesangbuch, 1954 rausgäa vom Fritz Bachmann ond vom Hermann Mühleisen, Schrifdaniiderlag vom Evangelischa Jugendwerk Stuegert en Gemeinschaft mit-em Gütersloher Verlagshaus Gerd Mohn.
  • Posaunenklänge, 1958 vom Hermann Mühleisen rausgäa em Ufftrag vom Evangelischa Jungmännerwerk en Wirdaberg, a Sammlong vo 383 Bearbeidonga vo Choräl, Volksliader ond konzertander Bläsermusik mit Grifftabella fir Blechblosinstrument vo älle Tonarda, Schrifdaniiderlag vom Evangelischa Jugendwerk Stuegert.

Weblink[ändere | Quälltäxt bearbeite]

Fuaßnoda[ändere | Quälltäxt bearbeite]

  1. Bei dr Karlshöhe Ludwigsburg handlet’s sich om a kirchlicha Stifdong noch-em birgerlicha Recht.
  2. Heitzodag hoißt’s Evangelisches Jugendwerk.
  3. Soddiche Landesposaunadäg geit’s bis en d Gegawart älle zwoi Johr ama Wochenende em Mai oder Juni. Gspiilt wuud en fenf vorschiidene Kircha bei de Goddesdenscht. Heheponkt ischt emmer d Abschlusskondgeabong uff-em Minschderplatz, wo rond 9.000 Bläser zamma musiziiret. Beim vorledschda Choral, Nun danket alle Gott, ond beim sich ooschlisenda Wachet auf, ruft uns die Stimme werdet dia Bläser vo de Glocka vom Ulmer Minschder begleidet.