Helvetia

Us der alemannische Wikipedia, der freie Dialäkt-Enzyklopedy
d Helvetia ufeme Zweefränkler
d Helvetia ufere Briefmargge usem Joor 1881

D Helvetia isch en imaginäri Frauefigur, wo allegoorisch d Schwiz versinnbildlicht.

Si werd meischtens miteme Schild, wo s Schwizerchrüz druf isch, und ere Lanze dargstellt. Ire Name laitet sich vom Volch vo de Helvetier ab, wo früener, vor de Röömerzyt, im Schwizerische Mittelland gwont hend.

Z erschtmol isch ane 1676 as Sinnbild vo de Aidgnosseschaft e Frau, d "Eidtgenössische Dam", dargstellt wore. Noch de Propagierig vo de Helvetier as Vorfaare vo allne Schwiizer het die Daame de Name ”Helvetia“ öbercho, und mit de Gründig vom moderne Schwizerische Bundesstaat ane 1848 isch iri Bidütig no gstige. Si isch uf Gältstuk und Briefmargge abbildet worde. Hüt isch si numeno uf de Füfzgerli, em Aifränkler und em Zweefränkler abbildet. Degege stellt de Frauechopf ufem Füferli, Zeenerli und Zwänzgerli d Libertas ("Fraihait") dar, und ufem Föifliber gseht mer de chopf vomenen Alphirt.

De Name ”Helvetia“ stoot au uf de schwizerische Briefmarke, demit me nöd de Name i alne vier Landessprooche schriibe mue. Usem gliiche Grund het mer as Landeskennzaiche d Sigle CH gwäält, d Abchürzig vo Confœderatio Helvetica, em latinische Name vode Schwizerische Aidgnosseschaft.

De Name ”Helvetia“ werd i gwüssne Sprooche au för d Schwiz bruucht, so im neugriechische (Ελβετία, Elvetía) oder em Irische (An Elvéis).

Galeri[ändere | Quälltäxt bearbeite]

Weblinks[ändere | Quälltäxt bearbeite]

 Commons: Helvetia – Sammlig vo Multimediadateie