S Woonhuus Colnaghi

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Dialäkt: Baseldütsch

S Huus Colnaghi isch e dänggmolgschützts Woonhuus an dr Wänkestrooss 82 z Rieche.

S Archidektebüro Artaria und Schmidt het s Colnaghi-Huus entworfe und 1927 as ersts Woonhuus mit Staalskelett in dr Schwiz baut. Es isch e tüpischs Bischbil für s Nöije Baue und alles, wo dere Archidektuurbeweegig wichdig gsi isch, isch in däm Bau realisiert worde: es si standartisierti Industriibrodukt, wo uf em Määrt gsi si, verwändet worde, und d Bauwiis isch modular. Farbe wärde iigsetzt zum gliichartigi Bauelimänt z bezäichne und eso uf die konstruktivi und rüümligi Struktur vom Bauwärk hiiwiise. D Deckene und d Bööde si us Bimsbetonblatte und iiri Gröössi het d Dimensioone vom Staalgrüst bestimmt. S Dach isch flach und mit Asfalt abdichdet.

Industrielli Baumethode si denn no ganz nöi gsi und nid im Woonbau iigsetzt worde. Es isch e modärns Bauwärk entstande, wo frei vo «Modernisme» isch, und au hüte no mit sinere Schlichthäit modärn usgseet.

S Huus Colnaghi stoot uf eme Grundstück wo liicht ufwärts goot. Es het e Durmartige Drakt, wo drei Stöck hooch isch und dört si d Stääge dinne, d Wirtschafts- und Nääberüüm. Im zwäistöckige Däil vornedraa befinde sich im Bardeer Woon- und Ässzimmer und im erste Stock e Korridor, wo Schloofzimmer uf en uusegönge. D Düüre und d Fänster gönge bis an d Decki uufe und d Fänster si so bräit wie d Rüüm sälber.

S Huus Colnaghi isch vo 1991 bis 1993 umfassend renowiert worde.

Kwelle[ändere | Quälltäxt bearbeite]

  • Haus Colnaghi uf citymobile.ch, abgrüeft am 8. Juni 2014
  • Cultural connections uf architectsjournal.co.uk, abgrüeft am 8. Juni 2014
  • Mercedes Daguerre, Roman Hollenstein: Birkhäuser architectural guide Switzerland: 20th century, Birkhäuser Verlag, 1997, S. 126

Koordinaten: 47° 34′ 40,6″ N, 7° 39′ 11,5″ O; CH1903: 616143 / 269715