S Hôtel de l'Univers z Baasel
Koordinate: 47° 32′ 54,4″ N, 7° 35′ 18,4″ O; CH1903: 611278 / 266426
| Dialäkt: Baseldütsch |
S ehemoolige Hôtel de l'Univers isch e fümfstöckigs Geböid im Jugendstil an dr Centralbahnstrooss 1-7 z Baasel. Es gältet as äis vo de Baasler Kulturgüeter mit ere regionale Bedütig.
Die oobere Stöck vom middleri Däil si e chli witer hinde as d Fassaade und häi Balköön, wo vo Süüle gstützt wärde. Dr Ostflüügel isch seer vil schmaaler as dr Westflüügel, wo dr Abschluss von em rund isch.
Baugschicht
[ändere | Quälltäxt bearbeite]S Hotel
[ändere | Quälltäxt bearbeite]S Geböid isch vom Archidektebüro La Roche, Stähelin & Co. in de Joor 1904 bis 1906 baut worde.[1] Dr Centralbahnhof nääbedra isch 1907 iigweit worde. Offiziell het s Hotel «Grand Hôtel et Savoy Hôtel Univers» ghäisse. Es gseet us, wie wenn das Grand Hotel nit grad erfolgriich gsi sig, denn scho e baar Joor spööter isch s leer gstande.
D Bangg für internazionale Zaaligsusgliich
[ändere | Quälltäxt bearbeite]1930 isch s Geböid zum Sitz vo dr Bangg für internazionale Zaaligsusgliich (BIZ) worde. D BIZ isch die eltisti internazionali Finanzorganisazion uf dr ganze Wält und gältet as d "Bangg vo de Zentralbangge". Iiri Grundstügg und Aagstellte si nume däilwiis dr schwizerische Hohäitsgwalt underworfe. D Bangg het ursprünglig s alte Hotel nume as e zwäijööhrigs Brovisorium aagluegt, isch denn aber bis 1977 bliibe, wo si denn in dr nöi bauti 24-stöckig BIZ-Durm züüglet isch, wo nume e baar hundert Meter äwägg isch.
S Bürogeböid
[ändere | Quälltäxt bearbeite]Denn het mä d Rüüm nöi ufdäilt und es isch hüte e Bürogeböid für verschidnigi Firme. Im Barder befindet sich e chinesischs Restorant.
Kwelle
[ändere | Quälltäxt bearbeite]- Ehemaliges Hôtel de l'Univers - Basel, Switzerland - Austrian and Swiss National Heritage Sites uf Waymarking.com, abgrüeft am 19. Novämber 2014
- Das "Grand Hôtel de l'Univers" in Basel: erbaut von den Architekten La Roche, Stähelin & Co. in Basel (Site cha nüme abgrüeft wärde; Suche im Webarchiv) us dr Schweizerische Bauzeitung, Band (Jahr): 47/48 (1906) Heft 3 (persistent link: http://dx.doi.org/10.5169/seals-26044)