Gustave Doré

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Dr Gustave Doré

Dr Paul Gustave Doré (* 6. Januar 1832 z Stroossburg; † 23. Januar 1883 z Baris) isch e franzöösischer Mooler und Grafiker gsii, wo sich vor allem as Illustrator e Naame gmacht het.

Biographii[ändere | Quälltäxt bearbeite]

Im Doré si Begaabig as Zäichner isch scho ufgfalle, won er no Schüeler gsii isch. Er het au won er erst sibni gsi isch aagfange meerer Instrumänt afo spiile. Uf dr Giige isch er virtuoos worde. Mit nüüni het er zum erste Mol en Illustrazioon vom Dante Alighieri siiner Göttlige Komödie gmacht. Mit drizääni isch er uf Baris gange und het zwäi Joor druf 1847 as Illustrator bim Journal pour rire gschafft. Im gliiche Joor isch au siini ersti Arbet, Die Abenteuer des Herkules, im Pariser Verlag Aubert veröffentligt worde.

1853 het er Illustrazioone für d Wärk vom Lord Byron gmacht, spööter Bilder für en änglischi Bible, und 1863 370 Illustrazioone für die franzöösischi Usgoob vom Miguel de Cervantes sim Don Quijote.

D Bibelillustrazioone häi dr Doré z Ängland bekannt gmacht und er het dr Ufdraag überchoo e Bordret vo London z zäichne. 1872 isch s Buech London: A Pilgrimage erschiine mit 180 Stich. S Buech isch drfüür kritisiert worde, ass si Fokus uf d Armekwardier grichdet sig.

Dt Gustave Doré isch am 23. Januar 1883 z Baris am ene Herzinfarkt gstorbe.

Uswaal vo Wärk[ändere | Quälltäxt bearbeite]

Dr Doré isch 1854 mit seinen Holzstich im François Rabelais sim Gargantua und Pantagruel und 1855 im Honoré de Balzac siine Tolldreiste Geschichten bekannt worde. Er het denn no öbbe 90 Wärk vo dr Wältlitratur illustriert, drunder:

Joor Autor Wärk
1861 Dante Alighieri Göttligi Komödie
1862 Gottfried August Bürger Münchhausen
1862 Charles Perrault Märli
1863 Miguel de Cervantes Don Quijote
1866 diversi/unbekannt D Biible
1866 Jean de la Fontaine Fable
1866 John Milton Paradise Lost
1866 Samuel Taylor Coleridge The Rime of the Ancient Mariner
1884 Edgar Allan Poe The Raven

Iifluss[ändere | Quälltäxt bearbeite]

Im Doré siini Biibelillustrazioone ghöören immer no zu de bekanntiste überhaupt, er gältet as äine vo de grösste Mäister vo däm Schaner. Siini 230 Bibelgrafike si under anderem vo de berüemte Graphiker Pisan, Pannemaker und Laplante gstoche worde.

Dr Doré het bizarri Bilder vo Faabelwääse, Monster, Skelett und ghäimnisvolle Sagegstalte gmacht. Drbii si d Stich handwärklig hervorragend usgfüert, d Diefewirkig und d Darstellig vom Liecht si mäisterhaft. Si Wärk het dr Surrealist Salvador Dalí entschäidend beiiflusst, un dä het si druckgrafischs Wärk au an de groosse Theme vo dr Wältlitratur orientiert. Stark beeiidruckt vom Doré sim Wärk isch dr Walter Moers gsi, wo 2001 si Roman Wilde Reise durch die Nacht um 21 Bilder vom Doré ume konstruiert het. Noch dr Künstlere Valentine Hugo het dr Max Ernst für sini Kollascheserii Une semaine de bonté – Eine Woche der Güte (1933) näbe zitgenössische Illustrazioone au Grafike vom Doré brucht. Sini Illustrazioone für em Samuel Taylor Coleridges The Rime of the Ancient Mariner het dr Doré sälber as sini beste bezäichnet.

Gallerii[ändere | Quälltäxt bearbeite]

Litratur[ändere | Quälltäxt bearbeite]

  • Nigel Gosling: G. Doré, engl. 1973 und Rembrandt Verlag, Berlin 1975, ISBN 3-7925-0223-2
  • Walter Moers: Wilde Reise durch die Nacht. mit Illustrationen Dorés, einer tabellarischen Biographie und einem Verzeichnis der wichtigsten Werke.
  • H. Guratzsch / G. Unverfehrt (Hrsg.): Gustave Doré. – Die bibliophilen Taschenbücher (2 Bände). Harenberg, Göttingen 1982, ISBN 3-88379-348-5.
  • Gustave Doré. Berlin: Eulenspiegel-Verlag, 21990, ISBN 3-359-00253-9
  • Friedrich Wilhelm Bautz: Gustave Doré. In: Biographisch-Bibliographisches Kirchenlexikon (BBKL). Band 1, Hamm 1975, Sp. 1360–1361.

Weblingg[ändere | Quälltäxt bearbeite]

 Allmänd (Commons): Gustave Doré – Album mit witere Multimediadateie
Dä Artikel basiert uff ere fräie Übersetzig vum Artikel „Gustave_Doré“ vu de dütsche Wikipedia.

E Liste vu de Autore un Versione isch do z finde.