Gusch Emunim

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Dr Rabbiner Mosche Levinger, äine vo de Aafüerer vom Gusch Emunim.

Gusch Emunim (hebräisch ‏גּוּשׁ אֱמוּנִים[1]‎; dr „Block vo de Dröije“) isch[2] en usserparlamentarischi jüüdischi messianischi Organisazioon z Israel gsi. Si isch 1974 vo Absolwänte vo dr Jerusalemer Jeschiwa Merkas HaRaw Kook gründet worde. In de 1980er Joor het sich d Beweegig ufglööst, aber vili vo iire Aahänger si hüt in politische Bardeije aktiiv.

S Ziil vo dr Beweegig[ändere | Quälltäxt bearbeite]

S Ziil vom Gusch Emunim isch s gsi, ganz Eretz Israel, wo noch dr biblische Überliiferig Gott de Juude verhäisse het, mit Juude z besiidle. Er het sich drbii uf d Leere vom Abraham Isaak Kook (1865–1935), em erste aschkenasische Oberrabbiner vo Palestina wääred dr britische Mandatszit, und vo sim Soon Zwi Jehuda Kook (1891–1982) gstützt.

Ideologii[ändere | Quälltäxt bearbeite]

Dr Gusch Emunim het sich as e religiöös-zionistischi Ernöijerigsbeweegig verstande, und het d Gründig vo Israel as Däil vom ene Erlöösigsbrozäss gsee, wo au drzue ghöört, ass d Juude ganz „Eretz Israel“ wurde in Bsitz nee. Die religiöösi Ideologii vo dr Beweegig het uf em Messianismus basiert, dr Häiligkäit vom Volk Israel, dr Häiligkäit vom Land Israel und dr Häiligkäit vo dr Tora. Zum Häilige Land häi Israel, dr Gasasträife, s Westjordanland und Ost-Jerusalem ghöört, und die Gebiet döfe uf käi Fall zrugggee wärde. Au staatligi Instituzioone, wie die israelisch Armee, häi lut dere Ideologii döfe aagriffe und bekämpft wärde, wenn si Land an Nitjuude – zum Bischbil an Araber im Zämmehang mit eme Friidesabkomme – abdräte bzw. zrugggääbe.

Im Geegesatz zum Rabbiner Meir Kahana, wo e Dransfeer vo de Palestinenser befürwortet het, het dr Gusch Emunim e friidlige Koexistänz mit dr nidjüüdische Bevölkerig aagsträbt, allerdings noch sine äigene religiöös-politische Vorgoobe.

Litratuur[ändere | Quälltäxt bearbeite]

  • Idith Zertal, Akiva Eldar: Die Herren des Landes. Israel und die Siedlerbewegung seit 1967, DVA, Münche 2007, 592 Seiten
  • Gershom Gorenberg: The End of Days. Fundamentalism and the Struggle for the Temple Mount. Oxford University Press: 2000. 128–137

Fuessnoote[ändere | Quälltäxt bearbeite]

  1. http://www.morfix.co.il/%D7%92%D7%95%D7%A9%20%D7%90%D7%9E%D7%95%D7%A0%D7%99%D7%9D%E2%80%8E
  2. Aagoobe über d Beweegig uf dr Website vom israelische Parlamänts (änglisch), abgrüeft am 17. Mai 2015
Information icon.svg Dä Artikel basiert uff ere fräie Übersetzig vum Artikel „Gusch_Emunim“ vu de dütsche Wikipedia. E Liste vu de Autore un Versione isch do z finde.