Palais Sickingen
.jpg)
S Palais Sickingen (Sickinger Palais) in dr Salzstrooß z Fryybeg isch hite dr Sitz vum Landgriicht Fryybeg.
Gschicht[ändere | Quälltäxt bearbeite]
Böue woore isch s in dr Joor 1769-73 vum Pierre Michel d’Ixnard as Stadtpalais fir dr Freiherr Ferdinand Sebastian von Sickingen-Hohenberg. D Familie von Sickingen isch Noofolger vu dr Familie Schnewlin gsii un het zaalryychi Besitzige im Brysgau ghaa, unter anderem au ihri Summerresidenz, s Schloss Sickingen z Ebnet. S Gebei, wu in franzesisch klassizistischer Form uusgfiert isch, isch an dr Stell vu dr Hyyser zum Maienthau, zum Wolkenbruch, zur Scheuer un Rotes Haus[1] böue woore, wu bis zum Änd vum 16. Joorhundert im Bsitz vu dr Familie Schnewlin vu Landeck gsii un derno an d Freiherre von Sickingen-Hohenburg gange sin. Di hochwäärtig Innenuusstattig chaa mer no uf Foto im Innere vum Palais bschaue. Si isch, nääbe viile Vergoldige uf Gips un Holz, us 240 Gmeld bstande.[1]
Wu dr Erböuer anne 1772 verstoorbe gsii isch, het s Huus as Woonig fir syy Suun Kasimir dient, derno fir däm sy Suun, dr Ryychsgroof Wilhelm.[1] Mit em Änd vu Voordereeschtryych isch au s Änd vu syyre Zyt z Fryybeg chuu: är isch uf Eeschtrych zooge, wel er nume ne Untertan vun eme Chaiser het welle syy un nit au no eme Großherzog mieße diene.[1] Anne 1806 isch s Palais wäge däm fir 50.000 Gulde an s Großherzogtum Baade verchauft woore. Zeerscht isch s an d 1807 grindet Freiburger Lesegesellschaft vermietet woore, wu s hite no git unter em Name Museumsgesellschaft. Aber schnäll isch szue dr großherzoglige Residänz z Fryybeg woore. Zue dr Bewooner hän anne 1819 dr Ludwig, dr Leopold (mit syre Frau Sophie) un vor allem dr Friedrich II. ghert, wu no hyfiger doo gsii isch: 1850 fir e baar Wuche, 1853 uf ere Rais as Prinzregänt, 1856 no syre Hochzyt mit dr Luise, 1876 zue dr Enthillig vum Siigesdänkmol un 1880 bim Busech vu dr Landwirtschaftsuustellig z Waldkilch.[1]
Di letscht großherzoglig Bewooneri isch d Hilda gsii, wu au in dr Bumbennaacht am 27. Novämber 1944 do gsii isch, bis si in d Bunkeraalaage am Schlossbärg gflichtet isch un d Gebei dur meereri Bumbedräffer bis uf d Grundmuure vernichtet wooren isch. Nume d Fassade an dr Salzstrooß het dr Aagriff ooni greßeri Schääde iberstande.
In dr Joor 1962 bis 1965 isch s Gebei widerufböue woore, d Ussefassade isch in dr alte Foorm wider härgstellt woore. No oobe wird d Fassade au hite no dur s Woppe vu dr Herzeg von Sickingen abgschlosse. Böuherr isch s Staatlig Hochböuamt Fryybeg im Ufdraag vum Land Baade-Wirttebärg gsii. S Palais isch doderby as Böudänkmol in dr Neiböu vum Landgriicht intergriert woore, wu s bis hite bruucht. Zwische 2010 un 2011 isch d Fassade reschtaurient un renoviert woore.[1]
Fueßnote[ändere | Quälltäxt bearbeite]
- ↑ 1,0 1,1 1,2 1,3 1,4 1,5 Manfred Gallo: Freiburg Mitte: Domizil der badischen Großherzöge, Badische Zeitung, 21. Februar 2011, Zugriff am 31. Juli 2011
Literatur[ändere | Quälltäxt bearbeite]
- Peter Kalchthaler: Freiburg und seine Bauten. Ein kunsthistorischer Stadtrundgang. Neubearbeitete 4. Auflage. Promo-Verlag, Freiburg (Breisgau) 2006, ISBN 3-923288-45-X.
Weblink[ändere | Quälltäxt bearbeite]
Palais Sickingen im dütschsprochige Wikisource
Koordinate: 47° 59′ 39,5″ N, 7° 51′ 6,5″ O
|
Dä Artikel basiert uff ere fräie Übersetzig vum Artikel „Palais_Sickingen“ vu de dütsche Wikipedia. E Liste vu de Autore un Versione isch do z finde. |