Haibärg

Dr Haibärg (amtl. Großer Heuberg odr bloß Heuberg) isch a denn bsiedelte Hochfläch uf dr Schwäbischa Alb. Är isch dr haischte ond sid-wäschtlichschte Doal vo dr Schwäbischa Alb. Dr haischt Bärg isch dr Lemberg mit 1.015 m ü. NHN.

Äs isch strittig, wohär dr Nama Haibärg konnt. Oa Theorie isch, dass sich dr Nama vo dr Grafschaft Hohabärg ableitet, wo em Mittelalter Besitzunga uf em Haibärg ghet hòt. Di ander Theorie isch, dass dr Haibärg sein Nama em Hai verdankt, wo det doba vo bsonders guater Qualität sei soll ond s Landschaftsbild uf'm Haibärg prägt.

Bsiedlong

Sälle Gmoada gheeret zom graußa Haibärg:

Landkroas Duttlenga: Bärenthal (Bäradal), Böttingen (Bettenga), Bubsheim (Bubsa), Egesheim (Egesa), Gosheim (Gausa), Irndorf, Kolbingen (Kolbenga), Königsheim (Kingsa), Reichenbach am Heuberg (Reichabach), Renquishausen, Wehingen (Wähenga), Mahlstetten (Mòhlstetta)

Landkroas Semmerenga: Leibertingen (Leiberdenga), Schwenningen (Schwenenga), Stetten am kalten Markt (Schtetta)

Zollera-Albkroas: Meßstetten (Meschtetta, mit da Oartsdòal Hoaschdetta, Harta, Hossenga, Direnga, Oberdigasa, Ontrdigasa), Nusplingen (Nuschplenga), Obernheim (Oberna)

Dialäkt

Dr Haibärg gheert zom schwäbischa Spròchraum. Är leit a dr Grenz zom Niederallemanischa. Ge Wäschta na nämmet die allemanischa Merkmal zua. So sait ma zom Beispiel uf em eschtlicha Haibärg "du hòscht", "Sonna" ond "I be gsei", während ma em Wäschta "du häscht", "Sunna" ond "I bi gsi" sait.

Gschiicht

Dr grauß Haibärg hot zo Baada, Wirttabärg ond Praißa gheert.

Bis afang vom 20. Johrhondert isch dr Haibärg òne vo da eermschta Regiona z Deitschland gsei. Vil Haibärger send ge Siebabürga, Amerika oder e'd Schweiz ausgwanderet. Mit em Bau vom Lochapass ond dr Haibärgbah hät sich dees genderet. Nòch em erschta Wältkriag häts uf em Haibärg a kleis Wiartschaftswonder gea, wo vil kleine ond mittelständische Onternehma grendet worra send. No huit häts det doba e dänna kleina Derfer erstaunlich vil Induschtriebetrieb.

Seid 1908 isch zwischa Schdedda ond Meßschdedda dr Truppaiabongsplatz Heuberg.