Gottlieb Duttweiler

dr Gottlieb Duttweiler (um 1956)

D Dänkdafele ar Strählgass 13 ir Zürcher Altschdat, wo dr Duttweiler uf d Wält choo isch.

Dr Gottlieb Duttweiler (* 15. Auguschd 1888 z Züri; † 8. Juni 1962 z Züri) isch e Schwiizer Undernämer u Bolitiker (LdU) gsi.

Nach Schbekulazioone n im Erschde Wältchrieg u nachdäm er brobiert hed, as Farmer z Brasilie z läbe (s aber ned gschaffed het), het dr Duttweiler 1925 z Züri d Migros gründet. Mit fahrende Läde, mid emne uf ds Läbesnotwändigschde beschränkde u mit runde Briise hed er e Revoluzioon im Schwiizer Detaihandel igleited. As Ussesiiter hed er bi de normale Detaillischde hefdigi Reakzioone u mängi Brozäss usglöst; är isch kampfluschdig gsi u das hed ne bekannt gmachd. Dass er ke Alkohol u ke Dabakwaare verchouft het zeigd, dass er o idealischdisch gsi isch.

Är isch id Bolitik, u mit sire Lischde vo de "Unabhängige" isch er 1935 mit sächs angerne i Nazionalrat gwählt worde. 1936 hed er dr Landesring vo de Unabhängige gründet. 1940 isch er wäg eme Krach demonschdrativ as Bärner Nazionalrat zrüggdrätte. Vo 1943 bis 1949 isch er nomol im Nazionalrat gsi, u vo 1949 bis 195l Schdänderat, u nächär wider Nationalrat, bis er gschdorbe n isch.

Dr Duttweiler hed ou verschidnigi Ziitige gründet und hed viil für d Kultuur biitreid (under anderem mit der Gottlieb-und-Adele-Duttweiler-Schdifdig).

Literatuur

• Duttweiler-ABC. Vom Herr vor Migros u vom Meischder vom Landesring [e Dokumänte-Sammlig]. Jean Christophe-Verlag, Züri 1941 (E kritischi, bissigi, mängisch o schdritbari Usenandersetzig mit dr bolitische Gschdalt vom Duttweiler, ir Chriegsziit u vorhär, us dr Sichd vo de [lingge] Schwiizer Gwärchschafde.).
• Michael Heister: Gottlieb Duttweiler als Handels- und Genossenschaftspionier. Vom eigenutzorientierte Grosshändler zum gmeinwohlorientierte Gnosseschafder. Ide Schriften zum Genossenschaftswesen und zur öffentlichen Wirtschaft. Band 30, Duncker und Humblot, Berlin 1991, ISBN 3-428-07180-8 (o grad Dissertazioon ar Uni Köln 1991 gsi).
• Karl Lüönd: Gottlieb Duttweiler (1888–1962). En Idee mit Zuekunfd. In: Schweizer Pioniere der Wirtschaft und Technik, Band 72, Verein für Wirtschaftshistorische Studien, Meile 2000, ISBN 3-909059-20-1
• Marco Meier: Gottlieb Duttweiler – Migros-Gründer. Dr populäri Visionär. TA-Media, Züri 2000, ISBN 3-908515-42-4.
• Gottlieb Duttweiler im Munzinger-Archiv (Artikelaafang frei abruefbar)

Weblink

•  Commons: Gottlieb Duttweiler – Sammlig vo Multimediadateie
• Gottlieb Duttweiler uf dr Websyte vo dr Bundesversammlig
• Sigmund Widmer: Duttweiler, Gottlieb. In: Historisches Lexikon vo dr Schwiiz.

Kwälle

Dä Artikel basiert uff ere fräie Übersetzig vum Artikel „Gottlieb_Duttweiler“ vu de dütsche Wikipedia. E Liste vu de Autore un Versione isch do z finde.