Gisela Splett
| Dialäkt: Undermarkgreflerisch |
D Gisela Splett (* 20. Jänner 1967 z Sendelfenge) isch e dytschi Bolitikeri (Bindnis 90/Di Griene). Vu 2006 bis 2016 isch si Landdagsabgordneti im Landdag vu Bade-Wirttebärg gsii. Vu Mai 2011 bis Mai 2016 isch si derzue au Staatssekretäri im Minischterium fir Verchehr un Infrastruktur Mitglid vu dr Landesregierig vu Bade-Wirttebärg gsii. Dert isch si zueständig gsii fir Lärm- un Immissionsschutz un umwältbezogeni Uuswirkige vum Verchehr. In däre Funktion isch si au d Lärmschutzbeufdraiti vu dr Landesregierig gsii. Mit em Amtsaadritt vum Kabinett Kretschmann II im Mai 2016 isch si in s Finanzminischterium Bade-Wirttebärg gwächslet.
Läbe
[ändere | Quälltäxt bearbeite]D Gisela Splett het vu 1986 bis 1991 Geoökologi an dr Universität Bayreuth studiert. Derno het si fir s Norwegisch Waldforschigsinschtitut gschafft. Syt 1992 wohnt d Gisela Splett z Charlsrue. Dert het si bi dr Landesaastalt fir Umwältschutz un im Regierigsbresidium Charlsrue as Wisseschaftligi Aagstellti gschafft. Si het an dr Universitet Charlsrue promoviert.
D Gisela Splett isch ghyrote un het zwai Chinder.
Bolitik
[ändere | Quälltäxt bearbeite]Anne 1997 isch d Splett in d Bartei Bindnis 90/Di Griene yydrätte. 1999 isch si Mitglid vum Chraisvorstand Charlsrue gsii. Im nämlige Johr isch si in dr Charlsruejer Gmairot gwehlt un anne 2000 stellverdrättendi Fraktionsvorsitzendi wore. Vu 2003 bis zum Friejohr 2006 isch si Fraktionsvorsitzendi vu dr griene Gmairotsfraktion z Charlsrue gsii. Si isch Fachsprächeri fir Stadtentwicklig, Verwaltig/Finanze un Naturschutz gsii.
D Splett isch anne 2001 Ersatzkandidati bi dr Landdagswahl im Landdagswahlchrais Charlsrue II un Bundesdagskandidati bi dr Bundesdagswahl 2002. Vu 2003 bis 2006 isch si Vorstandsmitglid vu dr GAR (Grüne und Alternative in den Räten von Baden-Württemberg) gsii.
Syt 2006 isch si Landddagsabgordneti im Landdag vu Bade-Wirttebärg, wu si dr Wahlchrais Charlsrue I verditt.
In dr griene Landdagsfraktion isch si vu 2006 bis 2011 umwält- un entwickligsbolitischi Sprächeri gsii. In däre Zyt isch si zuesätzlig stellverdrättendi Vorsitzendi vum Umwältuusschuss un Mitglid im Oberryyrot gsii. Im Beraich Entwickligsbolitik het si sich vor allem fir e Widerbeläbig vu dr Partnerschaft zwische Bade-Wirttebärg un em oschtafrikanische Burundi yygsetzt.
Im Wahlkampf 2011 het si zum Spitzeteam um dr Winfried Kretschmann ghert. Am 12. Mai 2011 isch si as Staatssekretäri im Minischterium fir Verchehr un Infrastruktur mit Stimmrächt im grien-rote Kabinett veraidigt wore.
Zue dr Landdagswahl z Bade-Wirttebärg anne 2016 isch si nimi as Kandidati aadrätte. Am 12. Mai 2016 isch si as Staatssekretäri im Finanzminischterium veraidigt wore.
Ihri bolitische Hauptthemeberaich sin näbe Ökologi/Naturschutz au Kommunalbolitik un Verchehr. Dernäbe engaschiert si sich au im Beraich Chinder- bzw. Chlaichinderbedrejig.
