Giovan Battista Ramusio
Dr Giovan Battista Ramusio (* 20. Juli 1485 z Treviso; † 10. Juli 1557 z Padua) isch en italiänische Humanist, Historiker und Geograaf gsi.
Lääbe
[ändere | Quälltäxt bearbeite]Dr Ramusio het z Padua bim Pietro Pomponazzi und Aldo Manuzzio studiert, vor allem Latiinisch und Griechisch und vermuetlig au e baar orientalischi Sprooch. Vor allem het er sich aber dr Kosmografii und dr Geografii gwidmet. 1505 het er dr Alvise Mocenigo uf Bariis begläitet und het as Gsandte die venezianischi Republik am franzöösische Hoof mee as zwäi Joor lang verdräte. Spööter het er diplomatischi Räise u. a. in d Schwiz und uf Rom gmacht, und woorschinlig au uf Apulie. Es git Zügnis wo äim lön lo vermuete, ass er au z Egüpte und in Nordafrika gsi isch. 1513 isch er zum Kanzler und 1515 zum Sekretäär vom venezianische Senat ernennt worde. Zu sine Ufgoobe häi d Verhandligen mit em Sebastiano Caboto ghöört. Dr Ramusio het dr Girolamo Fracastoro kennt und vo 1546 bis 1550 in däm sim Huus gwoont. Anderi Bekanntschafte von em si dr Bernardo Navagero, dr Gasparo Contarini, dr Giacomo Gastaldi und dr Raimondi Torriani gsi. E Briefwäggsel mit em Pietro Bembo und em Girolamo Fracastoro si überliiferet.
Wärk
[ändere | Quälltäxt bearbeite]Vom Ramusio si Vorwort zum Quintilian und zum Livius erhalte, wo 1514 bzw. 1519 in dr Druckerei vom Aldo Manuzzio erschiine si. Er isch vor allem bekannt worde, wil er in sim monumentale Wärk Delle Navigationi e Viaggi, wo bi Giunti erschiine isch, die wichdigsti Räiselitratuur vo sinere Zit uusegee het. Mä vermuetet, ass dr Ramusio vo 1520 aa Material für die Publikazion gsammlet het. Dr ersti Band, wo Brich vo Räise uf Afrika din si, isch aber erst 1550 uusechoo, denn isch e Band über Räise uf Amerika erschiine, ooni ass dr Naame vom Herusgääber erwäänt wird, aber mit eme Widmigsbrief vom Ramusios an dr Fracastoro. E Band über Räise uf Asie isch 1559 postum publiziert worde. Die Sammlig het im 16. Joorhundert e Hufe Uflaage erläbt und het vil drzue biidräit, ass vili Räisebricht hüte bekannt si, u. a. dr Milione vom Marco Polo, wo dr Ramusio bearbäitet und veröffentligt het.
Litratuur
[ändere | Quälltäxt bearbeite]- Fabio Romanini: «Se fussero più ordinate e meglio scritte...». Giovanni Battista Ramusio correttore ed editore delle Navigationi et viaggi. Viella, Rom 2007
Webligg
[ändere | Quälltäxt bearbeite]
|
Dä Artikel basiert uff ere fräie Übersetzig vum Artikel „Giovan_Battista_Ramusio“ vu de dütsche Wikipedia. E Liste vu de Autore un Versione isch do z finde. |