Gwässerschutz

Dr Gwässerschutz isch e Deilberych vom Naturschutz. Er het dr Schutz vo Gwässer – das sind bsunders d Meer, d Seeä, d Flüss und d Bech – vor Verschmutzig und Vergiftig zum Ziel.

In dr Schwiiz zum Biischpiel hets scho sit em schtarke Bevölkerigs-Wachstum im 19. Jahrhundert und de entschprechend wachsende Huushalt-Abwässer periodisch immer wiider sognänti Alge-Blüetine in de Seeä gäh, ane 1898 sogar bereits in dreine, drunter em grosse Zürisee.

Vor allem nach em zweite Wältchrieg isch denn no s starke dünge mit Phosphat i dr Landwirtschaft und dr Gebruuch vo phosphat-haltige Wöschmittel drzue choo: D Gwässer sind wiit über ihri Selbscht-Reinigungschraft überdüngt worde und i deilne isch s ökologische Gliichgwicht umkippt.

Im Dezember 1953 het denn s Schwiizer Volk en Verfassigs-Artikel agnoo, wo die gsetzlichi Regelig vom Gwässerschutz ermöglicht het. Es isch aber au no 1964 zu nere Masse-Entfaltig vo Blau-Alge im Vierwaldstettersee cho. Erscht ab denn sind nodisno Kläranlage baut worde, wo das Problem entscherft händ.

Literatur

P. Walder: Gewässerbiologie und Gewässerschutz