Gerhard Wilhelm
| Dialäkt: Schwäbisch |
Dr Gerhard Wilhelm (* 27. Mai 1918 z Stuegert, † 10. Mai 2009 z Grafenau em Landkreis Beblenga, ischt a deitscher Chorleider gwäa.
Aus seim Leaba[ändere | Quälltäxt bearbeite]
Dr Gerhard Wilhelm ischt em Kriagsjohr 1918 – kurz vor-em Ende vom Erschda Weltkriag – z Stuegert uff d Welt komma. Scho em Kendesalder hot’r em Chor vo dr Wirdabergischa Musikhochschuel en seira Hoimetstadt ond späder bei de Stuttgarter Hymnus-Chorknaben mitgsonga. Noch seira Schuelausbildong hot’r a Musikstudiom uffgnomma, zerscht z Stuegert ond hendrher noh en Berlin. Abgschlossa hot’r deet sei Studiom mit zwoi Priafonga: 1938 als Akademischer Musiklehrer ond em Johr druff als Pianischt. Do drmit hot sich abr der Moo et zfriida gäa: er hot sich au noh zom Kabellmoischder ausbilda lassa. Ausgiabt hot’r so a Amt abr nia.
Noch-em Ende vom Zwoida Weltkriag ischt em Wilhelm sei greeschts Ooliaga gwäa, d Stuttgarter Hymnus-Chorknaben noch-ma lengera Dornreschenschloof wiider zom Leaba zo erwecka. 1946 ischt-em des schliaßlichau au glonga. Em Lauf dr Zeit hot’s dr Wilhelm gschafft, da Hymnus zo-ma Spitza-Konzertchor zo entwickla ond en weit ibr Stuegert naus bekannt zo macha. Sogar ens Ausland hot’r mit seim Chor Konzertreisa ondrnomma. Des beachtliche Niveau vo-ma eiropäischa Format koo mr uff vorschiidene Rundfunk- ond Schallpladda-Uffnahma feschtstella. 41 Johr lang – bis zo seim Eitridd en da Ruhestand em Johr 1987 – isch dr Wilhelm dr Leider vo sellem Chor gwäa.
Am 10. Mai 2009 hot dr Gerhard Wilhelm – bloß a baar Däg vor dr Vollendong vo seim 91. Lebensjohr – seine Auge fir emmer gschlossa.
Ehronga[ändere | Quälltäxt bearbeite]
Vom Land Bada-Wirdaberg isch dr Gerhard Wilhelm fir seine grauße Vordinscht oms Musikleaba en Bada-Wirdaberg zom Ehraprofessr ernannt worra.
Quella[ändere | Quälltäxt bearbeite]
- Siegfried Bauer: Württembergische Größen der Kirchenmusik, a Ardikel en dr Festschrift Landeskirchenmusikfest 2017, rausgäa vo de Württembergische Blätter für Kirchenmusik, Ausgab 3/2017, S. 64–73
- Lueg d Weblink